SAKARIEA 6

₁Ka talima holimo hape, 'me ka bona likariki tse 'ne tsa ntoa li e-tsoa pakeng tsa lithaba tse peli tsa lethose! ₂Kariki ea pele e ne e huloa ke lipere tse khunong, ea bobeli e huloa ke tse ntšo, ₃ea boraro e huloa ke tse tšoeu, ea bone eona e huloa ke tse koebu. ₄Eaba ke botsa lengeloi le neng le ntse le bua le 'na, ke re: “Monghali, lintho tsee ke lintho ling?”

₅Lengeloi la nkaraba, la re: “Ena ke meea e mene ea leholimo, e tsoang kapele ho Morena oa lefatše lohle. ₆Kariki e huloang ke lipere tse ntšo e leba nq'a lebōea; e huloang ke tse tšoeu e leba nq'a bophirimela; athe e huloang ke tse koebu eona e leba nq'a boroa.”

₇Lipere tse koebu tsona ha li tloha li ile tsa potlakela ho haōla le lefatše lohle. Lengeloi la re: “E-eang, le haōle le lefatše lohle.” Kahoo lipere tseo tsa tloseletsa ho haōla le lefatše lohle.

₈Eaba lengeloi lea hōoeletsa, le re ho 'na: “Bona, lipere tse lebang naheng e ka lebōea li kokobelitse khalefo ea Morena naheng eo.”

₉Morena a bua ho 'na, a re: ₁₀“Amohela limpho tsa silefera le tsa khauta ho ba khutlang Babilona, bothōpuoeng, e leng bo-Heledai, le Tobiea, le Jedaea. Ha u qeta ho li amohela u ee ha Josiea, mora oa Sofonea. ₁₁Ka silefera eo le ka khauta eo u etse mofapahlooho, u o roese Joshua, Moprista e Moholo, mora oa Josadake. ₁₂U be u bolelle Joshua hore Morena oa mabōtho o bua tjena: ‘Monna ea bitsoang Lekala ke enoa; o tla hlōmela moo a leng hona teng, a hahe Tempele ea Morena. ₁₃Ke eena ea tla haha Tempele ea Morena. O tla apesoa botlotlehi, a rene a lutse teroneng ea hae. Moprista le eena o tla lula teroneng ea hae, 'me bobeli ba bona ba tla sebetsa 'moho ka khotso le ka kutloano. ₁₄Ha e le mofapahlooho oona o tla beoa ka Tempeleng ea Morena, e le hore ho tle ho hopoloe molemo oa bo-Heledai, le Tobiea, le Jedaea, le Hene, mora oa Sofonea.’

₁₅“Batho ba tla tloha hōle, ba tl'o thusa ho haha Tempele ea Morena. Ke moo le tla tseba hore Morena oa mabōtho o nthōmme ho lōna. Tsena tsohle li tla phethahala ha le ka mamela lentsoe la Morena Molimo oa lōna.”