Pono ea botšelela: Buka e fōfang sebakeng
1Ka talima hape, 'me ka bona buka e fōfang sebakeng! 2Lengeloi la mpotsa, la re: “U bona eng?”
Ka le araba, ka re: “Ke bona buka e fōfang sebakeng: Bolelele ba eona ke limethara tse robong, bophara ba eona ke limethara tse 'ne le halofo.”
3Eaba le re ho 'na: “Bukeng ena ho ngotsoe thōhako e tla aparela naha kaofela. Ka lehlakoreng le leng thōhako ena e bolela hore lesholu le leng le le leng le tla timetsoa, ka ho le leng e bolela hore mang le mang ea hlapanyang ka leshano le eena o tla timetsoa. 4Morena oa mabōtho o bua tjena: ‘Thōhako ena ke tla e rōmella. E tla kena ka tlung ea lesholu, e kene le ka tlung ea ea hlapanyang ka leshano ka lebitso la ka. E tla kena ka tlung ea hae, e funtsolle marulelo a eona, e heletse le marako a eona.’ ”
Pono ea bosupa: Mosali ea ka morifing
5Eaba lengeloi le neng le bua le 'na lea atamela, le re: “Talima holimo, u bone sena se tlang.”
6Ka le botsa, ka re: “Ke eng?”
La nkaraba, la re: “Ke morifi.” La boela la re: “O tšoantša bokhopo ba batho ba naha eohle.”
7Eaba ke bona sekoahelo sa loto, sa morifi oo, se koaholloa, 'me kahar'a morifi oo ho lutse mosali.
8Lengeloi la re: “Enoa o tšoantša Bokhopo!”
Eaba le mo katella kahar'a morifi, la ba la o koahela ka sekoahelo sa loto.
9Ha ke talima holimo ka bona basali ba babeli ba e-tla ba fōfa, mapheo a bona a kang a mokotatsie a khile moea. Basali bana ba phahamisetsa morifi ona holimo.
10Ka botsa lengeloi le neng le bua le 'na, ka re: “Basali baa ba isa morifi oo hokae?”
11La nkaraba, la re: “Ba o isa naheng ea Babilona, moo ba il'o o hahela ntlo teng. Ha ntlo eo e se e hahiloe, ba tla bea morifi ono litulong tsa oona.”
