Jerusalema le lichaba
1Bona, letsatsi la Morena lea tla, leo ka lona tse hapiloeng ho uena li tla aroleloa kahar'a motse oa Jerusalema.
2Ke tla bokella lichaba tsohle ho tla loantša Jerusalema; motse ona o tla haptjoa, matlo a lobeloe, le basali ba betoe. Halofo ea baahi ba motse e tla thōpuoa, empa masalla a bona a tla 'ne a be teng motseng ona.
3Morena o tla futuhela lichaba tseo, joalokaha a e hlanaka mohl'a tsatsi la ntoa. 4Mohl'a tsatsi leo, Morena o tla ema Thabeng ea Mehloaare, e ka bochabela ho Jerusalema. Thaba ea Mehloaare e tla petsoha ka lehare, ho tloha bochabela ho isa bophirimela, ho hlahe khohlo e tebileng; karolo e 'ngoe ea thaba e tla ea lebōea, e 'ngoe eona e ee boroa. 5Le tla baleha le fete khohlo ea thaba ea ka, hobane khohlo ea lithaba e tla ba e hobaletse ho ea fihla Asale. Le tla baleha joalokaha le ne le balehe ha lefatše le reketla mehleng ea puso ea Usiea, khosi ea Juda. Joale Morena Molimo oa ka, o tla tla a e-na le bahalaleli bohle.
6Mohl'a tsatsi leo, ho ke ke ha e-ba le khanya, leha e le mohatsela, kapa serame sa lala. 7E tla ba letsatsi le sa tšoaneng le a mang, letsatsi le tsejoang ke Morena feela, letsatsi le se nang nyene kapa bosiu. Ka phirimana khanya e tla 'ne e be teng.
8Mohl'a tsatsi leo, metsi a bophelo a tla phalla a e-tsoa Jerusalema, halofo ea 'ona e phallele leoatleng le ka bochabela, halofo e 'ngoe eona e phallele leoatleng le ka bophirimela. Ho tla ba joalo hlabula le mariha.
9Morena e tla ba eena khosi ea lefatše lohle. Mohl'a tsatsi leo, Morena o tla ba mong, le lebitso la hae e be lona le inotši.
10Naha eohle e tla ba lehoatata ho tloha Geba ho ea fihla Rimone, ka boroa ho Jerusalema. Empa Jerusalema e tla phahamisoa, e 'ne e be tulong tsa eona, e leng ho tloha Khorong ea Benjamine ho ea fihla Khorong ea Pele, le ho ea Khorong ea Sekhutlo; le ho tloha Toreng ea Hananele ho ea fihla litlhōtlelong tsa veine tsa khosi. 11E tla ba le baahi, 'me ha e sa tla hlola e timetsoa. Jerusalema e tla sireletsoa.
12Lena ke lona lefu la seoa, leo ka lona Morena a tla otla lichaba tsohle tse loantšitseng Jerusalema: Linama tsa tsona li tla bola, tsona li ntse li phela, mahlo a tsona a sale e le mehoboko, le maleme a tsona a bolle mahalapeng a tsona.
13Mohl'a tsatsi leo, Morena o tla etsa hore batho ba tšohe haholo. Motho o tla tšoara oa habo ka letsoho, 'me ba tla loantšana. 14Juda le eona e tla loantša Jerusalema. Maruo a lichaba tsohle tse e pota-potileng a tla bokelloa hammoho: Khauta e ngata le silefera e ngata, le liaparo tse ngata haholo.
15Lefu la seoa le tšoanang le lena le tla bolaea lipere, le limmeile, le likamele, le litonki, le liphoofolo tsohle tse ka liahelong tseo.
16Ke moo masalla a tsoang lichabeng tsohle tse ileng tsa futuhela Jerusalema a tla nyolohela teng ka selemo le selemo, ho ea khumamela Khosi, Morena oa mabōtho, le ho ea keteka Mokete oa Maphèphè. 17Haeba lichaba tse ling tsa lefatše li ke ke tsa nyolohela Jerusalema ho ea khumamela Khosi, Morena oa mabōtho, pula e ke ke ea na linaheng tsa tsona. 18Haeba sechaba sa Egepeta se sa nyolohe ho ea khumamela Khosi, Morena oa mabōtho, pula e ke ke ea na naheng ea sona; se tla oeloa ke lefu la seoa, leo ka lona Morena a bolaeang lichaba tse sa nyoloheleng Jerusalema, ho ea keteka Mokete oa Maphèphè. 19Ena e tla ba eona kotlo ea Egepeta le kotlo ea lichaba tsohle tse sa nyoloheleng Jerusalema ho ea keteka Mokete oa Maphèphè.
20Mohl'a tsatsi leo, mantsoe ana a tla ngoloa holim'a litšepe tse melaleng ea lipere, ho thoe: “Ke tse khethetsoeng Morena.” Lipitsa tsa ho pheha tse ka Tempeleng ea Morena, li tla ka mafisoana a kapele ho aletare. 21Lipitsa tsohle tse Jerusalema, le tse metseng eohle ea Juda, li tla khetheloa Morena oa mabōtho, 'me bohle ba tlil'o nyehela ka sehlabelo ba tla nka tse ling tsa lipitsa tsena, ba phehe ka tsona. Mohl'a tsatsi leo, ha ho sa tla ba Mokanana ka Tempeleng ea Morena oa mabōtho.
