SAKARIEA 12

₁Ona ke molaetsa oa Morena. Lena ke lentsoe la Morena malebana le Iseraele. Morena ea alileng maholimo, ea theileng lefatše, ea bululetseng moea kahare ho motho, o re: ₂“Ke tla etsa hore Jerusalema e be senoelo sa veine, se etsang hore lichaba tsohle tse e pota-potileng, li thèkèsèlè. Juda e tla etsetsoa thibella, esita le eona Jerusalema. ₃Mohl'a tsatsi leo, ke tla fetola Jerusalema lefika le ke keng la sisinngoa ke lichaba tsohle. Bohle ba lekang ho le sisinya le tla ba pitla. Lichaba tsohle tsa lefatše li tla e likanela. ₄Mohl'a tsatsi leo, ke tla tšosa pere e 'ngoe le e 'ngoe, ke hlantše mopalami oa eona,” ho rialo Morena. “Ke tla ela seli ba ntlo ea Juda, ebe ke foufatsa lipere tsohle tsa lichaba. ₅Joale baholo ba Juda ba tla bua ka pelo, ba re: ‘Baahi ba Jerusalema ba matlafatsoa ke Morena oa mabōtho, Molimo oa bona.’

₆“Mohl'a tsatsi leo, ke tla fetola baholo ba Juda, ke ba etse pitsa e hlenneng har'a tetema ea mollo, e ke serumōla se tukang har'a mangata a koro. Ba tla bolaea lichaba tsohle tse e pota-potileng, empa Jerusalema eona e tla sala e ntse e e-na le baahi moo e leng teng.

₇“Morena o tla pholosa litente tsa Juda pele, e le hore tlōtla ea ntlo ea Davida le tlōtla ea baahi ba Jerusalema e tle e se ke ea feta ea Juda. ₈Mohl'a tsatsi leo, Morena o tla sireletsa baahi ba Jerusalema, e le hore ba fokolang haholo har'a bona ba tle ba be joaloka Davida, le ntlo ea Davida e be joaloka Molimo, joaloka lengeloi la Morena le ba etellang pele. ₉Mohl'a tsatsi leo, ke tla timetsa lichaba tsohle tse futuhelang Jerusalema.

₁₀“Ke tla theolela moea oa kutloelo-bohlōkō le oa thapeli holim'a ntlo ea Davida le holim'a baahi ba Jerusalema. Ba tla talima 'na eo ba mo hlabileng, ba mo llele joaloka ea llelang ngoana ea inotši; ba mo sarelloe habohlōkō joaloka ea llelang mora oa hae oa letsibolo. ₁₁Mohl'a tsatsi leo, sello sa Jerusalema e tla ba sa 'mokotsane, se tšoane le sa mohla ho neng ho lleloa Hadade-Rimone, phuleng ea Megido. ₁₂Naha e tla lla, lelapa ka leng le lle ka bolona, le basali ba lle ba le bang: Lelapa la Davida le basali ba lona, lelapa la Nathane le basali ba lona, ₁₃lelapa la Levi le basali ba lona, lelapa la Shimei le basali ba lona, ₁₄le malapa a mang 'ohle le basali ba 'ona.