Morena o re sechaba se khutlele ho eena
1Ka khoeli ea borobeli ea selemo sa bobeli sa puso ea Dariuse, lentsoe la Morena la fihla ho moporofeta Sakariea, mora oa Berekiea, setlōhōlō sa Ido, la re:
2“Morena o ne a halefele baholo-holo ba lōna haholo. 3Ka baka leo, bolella sechaba sena, u re: Morena oa mabōtho o bua tjena: ‘Khutlelang ho 'na,’ ho rialo Morena oa mabōtho, ‘le 'na ke tla khutlela ho lōna,’ ho rialo Morena oa mabōtho. 4‘Le se ke la etsisa baholo-holo ba lōna, bao baporofeta ba mehleng ea pele ba neng ba ba bolelle, ba re: Morena oa mabōtho o bua tjena: Tlohelang metsamao ea lōna e khopo le liketso tsa lōna tse khopo hle, empa ha baa ka ba 'mamela, leha e le hona ho nkutloa,’ ho rialo Morena. 5Joale baholo-holo ba lōna ba hokae? Na baporofeta bona ba phela kamehla eohle? 6Ka bahlanka ba hae, e leng baporofeta, Molimo o ile a nea baholo-holo ba lōna melao le litaelo, empa ba se ke ba mamela, eaba Molimo oa ba otla.
“Joale ba baka, ba re: ‘Morena oa mabōtho o ne a rerile ho re otla ka baka la metsamao ea rōna le liketso tsa rōna, 'me o fela a phethile joalo.’ ”
Lipono tsa Moporofeta Sakariea:
Pono ea pele: Lipere
7Ka letsatsi la mashome a mabeli a metso e mene la khoeli ea leshome le motso o mong, e leng khoeli ea Hlakola, ka selemo sa bobeli sa puso ea Dariuse, Morena a boela a bua le moporofeta Sakariea, mora oa Berekiea, setlōhōlō sa Ido. Joale Sakariea a bua, a re:
8Har'a mp'a bosiu ka bona pono: Ka bona motho ea palameng pere e khunong! O ne a emisitse har'a lifate tsa mohlakola, tse ka khohloaneng. Kamora' hae ho ne ho e-na le lipere: tse khunong, tse sootho, le tse tšoeu.
9Ka botsa motho eo, ka re: “Monghali, lintho tsee ke lintho ling?”
Lengeloi le neng le bua le 'na la araba, la re: “Ke tla u bontša hore na ke lintho ling.”
10Eaba motho ea emeng har'a lifate tsa mohlakola oa araba, o re: “Batho bana ke bao Morena a ba rōmetseng ho tsamaea le lefatše lohle.”
11Batho bao ba re ho lengeloi la Morena le emeng har'a lifate tsa mohlakola: “Re tsamaile le lefatše lohle, 'me re fumane hohle e le khutso le khotso.”
12Lengeloi la Morena la bua, la re: “Oho, Morena oa mabōtho, ebe Jerusalema le metse ea Juda, eo u e halefetseng ka lilemo tsee tse mashome a supileng, u tla e hauhela neng?”
13Joale Morena a khothatsa lengeloi le neng le bua le 'na, a le tšelisa.
14Lengeloi le neng le ntse le bua le 'na la re: “Hōoeletsa, u re: Morena oa mabōtho o bua tjena: ‘Ke boulela Jerusalema le Sione haholo, 15feela ke mpa ke halefile haholo, ke halefetse balichaba ba iketlileng, hobane eitse ha ke ne ke halefile hanyenyane, eaba ba eketsa matšoenyeho a lōna.’
16“Ka baka leo, Morena o bua tjena: ‘Ke khutletse Jerusalema ho tla e hauhela, 'me Tempele ea ka e tla tsosoa,’ ho rialo Morena oa mabōtho. ‘Le khoele e methang e tla otlolleloa holim'a Jerusalema,’ ho rialo Morena oa mabōtho.
17“Hōoeletsa hape, u re: Morena oa mabōtho o bua tjena: ‘Metse ea ka e tla boela e e-ba le nala, Morena a tšelise Sione hape, a boele a ikhethele Jerusalema.’ ”
Pono ea bobeli: Linaka
18Ka boela ka talima, 'me ka bona linaka tse 'ne! 19Ka botsa lengeloi le neng le bua le 'na, ka re: “Lintho tsee ke ling?”
Lengeloi la nkaraba, la re: “Tsena ke linaka tse qhalantseng Juda le Iseraele le Jerusalema.”
20Joale Morena a mpontša malala a mane. 21Ka botsa, ka re: “Malala aa a tlil'o etsa'ng?”
Morena a nkaraba, a re: “Linaka tsena ke tsona tse qhalantseng Juda, hoo ho sa kang ha e-ba le motho ea neng a ka phahamisa hlooho. Empa malala ana a tlil'o tšosa le ho liha linaka tsena, e leng balichaba ba ileng ba futuhela naha ea Juda, ba qhalakanya sechaba sa eona.”
