1Ho molemo ho hloka bana
le ho ba le bokhabane,
hobane bona bo tla hopoloa
kamehla le mehla,
bo pakoa ke Molimo le batho.
2Ha bo le teng, batho baa bo etsisa;
ha bo le sieo, baa bo hloloheloa.
Mengoaheng e sa feleng bokhabane
bo roala mofapahlooho oa tlholo,
e le mohloli tlholisanong
e nang le meputso e sa silafaleng.
3Athe palohali ea litloholo
tsa ba se nang Molimo ha e na thuso;
ke moloko oa bana ba matšeho,
o ke ke oa e-ba le metso e tebileng,
'me o ke ke oa e-ba le motheo o matla.
4Moloko o joalo o ka sefate
se hlahisang makala nakoana;
empa kaha se fokolloa ke methapo,
se tla tsukutloa ke moea,
'me se koqoloe ke sefefo.
5Makala a sona a tla robeha
pele a tiea,
tholoana tsa sona
li ke ke tsa ba le thuso,
li tala, li mpe, li sitoa ho jeoa.
6Bana ba tsoetsoeng tlamahanong
e thibetsoeng,
e tla ba lipaki tsa sebe sa batsoali
ba bona, mohla kahlolo.
7Ea lokileng, leha a ka shoa
a sa le mocha,
o tla fumana phomolo.
8Botsofali bo hlomphehang
hase ka baka la lilemo tse ngata,
ha bo lekanngoe ka bolelele
ba bophelo.
9Bohlale bo ka moriri o moputsoa
mothong,
le bophelo bo se nang koli
bo ka boqheku.
Mohlala oa Henoke
10Ho kile ha e-ba le motho
ea khahlisang Molimo,
'me eena a mo rata;
a ba a mo ntša har'a baetsalibe,
a mo nka a ntse a phela.
11A tlosoa, esere bobe ba senya
kelello ea hae,
kapa mano a khelosa moea oa hae;
12hobane ho fahloa ke bobe
ho sitisa ho bona tse ntle,
'me setsokotsane sa litakatso tse mpe
se ferekanya kelello e hloekileng.
13Kaha ea lokileng a fihletse phetheho
ka nako e seng kae,
ho tšoana le ha a phetse
lilemo tse ngata.
14Moea oa hae o khahlisitse Morena,
hoo a ileng a mo ntša kapele
bokhopong bo mo pota-potileng.
15Empa batho, ha ba bona sena,
ha ba utloisise;
ha ho rothele bokong ba bona
hore Molimo o mosa le mohau
ho bakhethuoa ba hae,
le hore o phallela bahalaleli ba hae.
Qetello ea ba khopo
16Ea lokileng, leha e se le mofu,
o tla tsoa ba khopo ba ntseng ba phela;
'me e mocha ea khaolelitsoeng ke lefu
a tsoe ea khopo ea phetseng halelele.
17Ba khopo ba tla bona lefu
la ea bohlale,
ba sa utloisise morero oa Morena
ka motho eo,
le hore na ke ka baka la'ng
a mo sirelelitseng.
18Ba tla bona lefu la hae 'me ba le
nyelise;
empa Morena o tla ba tlepa litšeho.
Haufinyane e tla be e le litopo
tse khesehang,
har'a bafu e le ba nyefolehang
ka ho sa eeng kae.
19Molimo o tla ba ptjatlanya fatše,
'me a ba fetole limumu;
ba be joaloka mehaho e tsukutloang
metheong, e fetohang lesupi.
Ba tla ba lihlorisong,
'me mabitso a bona a tla lebaloa.
20Mohla ho hlahlojoang libe tsa bona,
ba tla atamela ka thothomelo,
'me liketso tsa bona tse khopo
li tla ba qosa mahlong a bona.
