SOLOMONE 19

₁Empa ba khopo ba ile

ba hlaseloa ho isa qetellong,

ke khalefo e se nang mohau,

hobane Molimo o tsebile e sa le pele

tseo ba tla boela ba li etsa,

₂le hore, hoba ba lokolle

sechaba sa hae

'me ba se qhale ka potlako,

ba tla koeneha 'me ba se lelekise.

₃Ha ba ne ba ntse ba tšoarehile

bofifing,

'me ba llela bafu ba bona mabitleng,

ba fihlela qeto e 'ngoe ea booatla:

batho bao ba neng ba ba kopile

ho tloha,

joale ba ba lelekisa joaloka babalehi.

₄Kabelo ea bona e nepahetseng

e ne e ba khannela qetong ena,

e ba lebatsa tse seng li etsahetse,

e le hore ba mamelle litlhokofatso

tse ntseng li hlokahala

ho phethisa kotlo ea bona;

₅'me e le hore sechaba sa hao

se tle se tšelisoe leoatle

ka mokhoa oa mohlolo,

empa bona ba thulane

le lefu le makatsang.

₆Libopuoa tsohle, ka mefuta ea tsona,

li ile tsa hlopshoa bocha

ho latela litaelo tsa hao,

e le hore bana ba hao

ba qobeletsoe kotsing.

₇Ha bonoa leru le khurumetsa liahelo,

'me mobu o ommeng o hlaha

moo metsi a neng a le teng pele;

Leoatleng le Lefubelu ha buleha tsela,

'me maqhubu a befileng a fetoha

phula e tala,

₈moo sechaba sohle

se ileng sa feta teng,

se sirelelitsoe ke letsoho la hao,

e le lipaki tsa limakatso tsena

tse hlollang.

₉E ne e ka lipere makhulong,

ba thala joaloka likonyana,

ba ntse ba rorisa uena, Morena,

ea ba lopolotseng.

₁₀Ba ne ba ntse ba hopola liketsahalo

tsa ha ba ne ba le naheng ea balichaba,

kamoo lefatše leo,

bakeng sa liphoofolo,

le neng le tsoala menoang,

le kamoo Noka,

bakeng sa lihlapi, e neng e hlatsa

boieane ba lihohoana.

₁₁Joale, hamorao, ba ile ba bona

mofuta o mocha oa linonyana,

ha takatso ea lijo

e ba khannela ho kopa tse latsoehang

₁₂'me ho ba khotsofatsa

likoekoe tsa nyoloha leoatleng.

₁₃Athe likotlo tsa tlela baetsalibe,

empa tsa etelloa pele ke mahalima

a bohale e le tlhokomeliso.

E ne e le toka ha ba hlokofatsoa

ka baka la bokhopo ba bona,

hobane ba ne ba bontšitse lehloeo

le lebe ka ho fetisisa ho balichaba.

₁₄Batho ba bang ba ne ba hana

ho amohela batho

bao ba sa ba tsebeng;

empa bona ba fetotse baeti

ba ba thusitseng makhoba.

₁₅Hase phetho: kahlolo e ntse e emetse

bane ba pele,

hobane ka baka le bora ba hana

ho amohela balichaba.

₁₆Empa bona, hoba ba amohele

baeti ba bona ka liatla tse peli,

'me ba ba fe litokelo tse tšoanang

le tsa bona,

ba ba imetsa ka mesebetsi ea bokhoba.

₁₇Joale le bona ba otloa ka bofofu,

ho tšoana le batho bane

ba neng ba le monyakong

oa motho eane ea lokileng,

'me ka ho lika-liketsoa

ke lefifi la bonkantjana,

bohle ba phopholetsa kahohle

ho fumana menyako ea bona.

₁₈Lihloliloeng li ile tsa fapanyetsana,

joalokaha ho fapanngoa

linoto harepeng

ho fetola sebopeho sa pina,

empa noto ka 'ngoe e ntse e bolokile

molumo oa eona.

Hona ho totobetse ka ho hlaka,

ha motho a hlahloba tse etsahetseng:

₁₉hobane tse phelang mobung

tsa fetoha tse phelang metsing,

ha tse sesang li tsamaea mobung;

₂₀metsing mollo oa tuka ho feta,

'me metsi a lebala matla a 'ona

a ho tima mollo;

₂₁athe malakabe, 'ona a ne a sa chese

linama tsa liphoofolo tse fokolang,

tse neng li itsamaela har'a 'ona,

leha e le ho qhibilihisa lijo tsane

tsa leholimo,

tse tšoanang le serame

se qhibilihang habonolo.

₂₂Ka tsohle, Morena, u phahamisitse

le ho tlotlisa sechaba sa hao,

'me ha ua ka ua lesa ho se thusa

kamehla le kahohle.