Baegepeta ba otloa ka seoa sa lefifi
1Li matla likahlolo tsa hao,
'me ho thata ho li lokolisa;
ka baka lena meea e sa hlalefang
ea kheloha.
2Ha batho bao ba se nang Molao
ba nahana hore ba ka hatella
sechaba se halalelang,
bona ka bobona ba ile ba rapalla fatše
chankaneng ea lefifi,
teronkong ea bosiu bo bolelele,
ba koaletsoe tlas'a marulelo a bona,
ba le hole le paballo e sa feleng
ea Molimo.
3Ha ba ntse ba hopola
hore libe tsa bona
tsa sekhukhung ha lia lemohuoa
ka baka la lesira le letšo la bolebali,
ba ferekanngoa ke matsoalo
a tšabehang,
ba tšosoa ke lipono.
4Esita le phapusi e ntšo
eo ba neng ba le ka ho eona
ea sitoa ho ba sireletsa tšabong,
empa marata a tšabehang
a utloahala ho ba pota-pota,
'me lithotsela tse hlonameng,
tse tiisitseng lifahleho, tsa hlaha.
5Ho ne ho se mollo o nang le matla
a ho ba bonesetsa,
esita le mahlaseli a phatsimang
a linaleli
a ne a hana ka khanya
bosiung boo bo bobe.
6Ba bona feela khanare
e tšosang ea mollo,
e neng e ipekemisa ka boeona;
'me hoba pono eo e nyamele,
ba ne ba tšohile
hoo ba ileng ba hloma eka tseo
ba li bonang li mpe le ho feta.
7Malepa a bona a boloi a ne a nyopile,
maqheka ao ba neng ba ithorisa
ka 'ona a hlahatsoa,
'me ba hlajoa ke lihlong.
8Ba etsang sa mokana
eka ba ka leleka tšabo
le pherekano meeeng e kulang,
ha kula bona ke letsoalo
le ba tšehisang batho;
9hobane hoja ho se letho
le khathatsang le ka ba tšosang,
ba tšosoa ke likokoanyana tse fetang
le linoha tse hoshang,
10ba e-shoa ke tšabo,
ba hana esita le ho talima sebakeng,
e leng ntho e sitoang ho phengoa.
11Bokhopo bo ipakahatsa e le
bokoala, 'me bo itsoa ka bobona;
hobane, ka ho tšoenngoa ke letsoalo,
bo totisa mathata kamehla.
12Tšabo hase ntho e 'ngoe haese
ho furalla thuso ea kelello.
13Ha motho ka ho se itšetlehe ka eona
a lahlile tšepo pelong ea hae,
o ikutloa le ho feta a se na tsebo
ea tse bakang tlhoriso ea hae.
14Bosiung boo, bo neng bo hloka
matla holim'a batho,
kaha bo ne bo e-tsoa botebong
ba Qalo ea bafu
eo le eona e se nang matla,
batho bao bohle ba ne ba robala
boroko bo tšoanang,
15ba ntse ba lelekisoa ke lithotsela
tse tšabehang,
le teng ba tsitsipane ke bokoala
ba meea ea bona;
tšabo e tsometsang, e sa lebelloang,
e ne e ba oetse holimo.
16Mang le mang, moo a neng a le teng,
a otlana fatše,
'me a rapalla ka chankaneng
e se nang mamati a litšepe.
17Leha e ne e le molemi kapa molisana,
kapa motho ea sebetsang mahoatateng,
o ne a tsometsoa, a oeloa ke
bomalimabe bo ke keng ba baleheloa;
hobane bohle ba ne ba le litlamong
tse tšoanang tsa lefifi.
18Mololi oa moea,
pina e monate ea linonyana har'a
makala a lifate a phatlaletseng,
ho phorosela ha metsi a phallang,
19ho lla ha mafika a helehang,
ho matha ha liphoofolo
tse tšethemang li sa bonoe,
ho puruma ha libatana tse hlaha,
ho luma ha mahaha lithabeng,
melumo ena kaofela e ne e ba
tsitsipanya ke tšabo.
20Lefatše lohle le ne le chabetsoe
ke khanya ea letsatsi,
'me batho ba ne ba etsa mesebetsi
ea bona ea mehla ho se thibelo.
21Ke batho bao feela
ba neng ba aparetsoe ke bosiu
ba lefifi le letšo-letšo,
boo e neng e le setšoantšo sa lefifi
leo ba neng ba baletsoe
ho amoheloa ke lona;
empa, ho bona, boima bo matla
ho feta lefifi leo,
e ne e le bona ka bobona.
