Molimo ke mohloli oa bophelo bo sa feleng
1Empa uena, Molimo oa rona,
u molemo, u na le 'nete,
u na le boiphapanyo 'me u busa
lintho tsohle ka mohau.
2Esitana leha re etsa libe re ba hao,
hobane re ananela borena ba hao;
empa ha re ka ke ra etsa sebe,
hobane rea tseba re baloa har'a ba hao.
3Ho u tseba ke ho loka
ho phethehileng,
le ho tseba matla a hao ke mohloli
oa bophelo bo sa feleng.
4Ha rea ka ra khelosoa ke ntho e mpe
e qapiloeng ke mahlale a motho,
leha e le mosebetsi o se nang thuso
oa batšoantši,
e leng setšoantšo se mebala-bala,
5seo pono ea sona e tsosang
ho maoatla takatso
le tlholohelo ea sebopuoa
se se nang bophelo le phefumoloho.
6Ke barati ba lintho tse khopo
'me ba sa lokeleng ho tšepa
ho hong haese tsona,
batho ba li etsang le ba li lakatsang
le ba li khumamelang.
Bothoto ba ho khumamela melimo ea letsopa
7Mohlomong sebopi se khoba ka
thata letsopa le bonolo,
'me se bopa sejana ka seng
seo re se sebelisang.
Ka letsopa le le leng se bopa lipitsa
tse etsang mesebetsi e hloekileng,
kapa e sa hloekang, ho se tlhalohanyo;
empa hore na mosebetsi oa ntho
e 'ngoe le e 'ngoe e tla ba ofe,
ke ea li bopileng ea tla etsa qeto.
8Joale o etsa mosebetsi
oo a sentseng nako ho oona,
ka ho bopa molimo oa bosaoana
ka letsopa lona leo,
eena motho ea neng a etsoe ka letsopa
nakoana pele ho mona,
'me ea tla khutlela kapele mobung
oo a ntšitsoeng ho oona,
ha a laeloa ho busetsa moea
oo a neng a o alimiloe.
9Empa o lebetse hore o baletsoe
ho shoa,
kapa hore bophelo ba hae
bo bokhutšoanyane
athe o hlolisana le basebetsi
ba khauta le silefera,
'me o etsisa basebetsi ba lethose;
o ithorisa ka ho qapa lintho
tseo e seng tsa 'nete.
10Pelo ea hae ke molora,
tšepo ea hae e fetoa
ke mobu ka bohlokoa,
le bophelo ba hae bo fetoa ke letsopa;
11hobane o hlotsoe ho tseba
ea mo bopileng,
'me a mo fa moea o sebetsang,
'me a bululela ka ho eena
moea o phelisang.
12Ho feta moo o nka bophelo
e le papali,
le litšiu tsa motho
e le setsi sa ho bapatsa;
hobane o re motho o tšoanetse
ho fumana phaello joang kapa joang,
esita le ka litsela tse fosahetseng.
13Motho enoa, ho feta mang
kapa mang, oa tseba
hore o etsa sebe,
ha a bopa ka mobu oa lefatše
lijana tse pshatlehang
le litšoantšo tsa melimo.
Kotlo ea Baegepeta
14Ba lithoto ka ho fetisisa
'me ba tsietsing ho feta bana ba masea,
ke lira le bahatelli
ba sechaba sa hao, Morena.
15Ba ile ba nka e le melimo
litšoantšo tsohle tsa melimo ea lichaba,
leha e e-na le mahlo a sa boneng,
le linko tse sa phefumoloheng,
le litsebe tse sa utloeng,
le menoana e sa phopholetseng,
le maoto a sitoang ho tsamaea.
16Ke motho ea li entseng,
ke ea nang le moea o alimiloeng
ea li bopileng;
empa ha ho motho ea ka bopang
molimo o tšoanang le eena.
17E le motho ea shoang
a ka etsa feela lintho tse shoeleng
ka matsoho a khopo a hae;
empa o ntse a feta ka bohlokoa
tseo a li khumamelang,
hobane eena o filoe bophelo,
athe tsona li ke ke tsa e-ba
le bona ho hang.
18Hape batho bao ba khumamela
esita le liphoofolo
tse khesehang ka ho fetisisa,
tse hlokang kelello
ho feta tse ling kaofela.
19Ha u li sheba, u ke ke ua fumana
letho le letle le ka u hapang
joaloka liphoofolong tse ling.
Molimo o ile a li siea,
ha a ananela le ho hlohonolofatsa
libopuoa.
