SOLOMONE 12

₁hobane moea oa hao o sa shoeng

o teng ho tsohle.

₂Ka hoo, hanyane ka hanyane,

u ntša liphoso ho ba u siteloang,

ua ba khalemela, ebile ua ba le lemosa

moo ba etsang sebe teng,

e le hore ba furalle bobe,

'me ba u tšepe, uena Morena.

₃Ba neng ba ahile khale-khale

lefatšeng le halalelang la hao,

₄u ile ua ba hloea

ka baka la mesebetsi ea bona

e nyonyehang,

mesebetsi ea boloi le meetlo e mebe,

₅lipolao tse se nang mohau tsa bana,

le mekete ea ho ja

nama le mali a motho

esita le likahare tsa hae.

₆Batho bao ba etsang

litšebeletso tsa sephiri,

batsoali bao ba fenethang bana

ba sitoang ho itšireletsa,

u ile ua laela hore ba timetsoe

ka matsoho a bo-ntat'a rona,

₇e le hore naha ea bohlokoa ho uena

ho feta tsohle

e tle e amohele sehlopha

se e tšoanelang sa bana ba Molimo.

₈Empa esita le batho bao

u ile ua ba qenehela,

hobane le bona e ne e le batho,

'me ua romela bobi e le lilelekela

tsa lebotho la hao,

ho ba ripitla hanyane ka hanyane.

₉Ke 'nete, u ne u ka neela ba khopo

liatleng tsa ba lokileng ka ntoa,

kapa ho ba felisa hang

ka libata tse tšabehang

kapa ka lentsoe le le leng feela

la khalefo.

₁₀Empa ka ho ba ahlola

hanyane ka hanyane

ua ba fa monyetla oa ho baka,

leha u ne u bona hore

moloko oa bona o khopo,

le hore bobe ba bona ke ba tlhaho,

le hore tsela eo ba nahanang ka eona

hase e ka hlolang e fetoha.

₁₁E bile moloko o rohakehileng

ho tloha tšimolohong,

'me e ne e se ka tšabo

ea mang kapa mang

u sa kang ua ba otla ka baka la libe

tsa bona.

₁₂Ha ho ea ka reng ho uena:

“U entse'ng?”

Ke mang ea ka hanyetsang

kahlolo ea hao?

Ke mang ea ka u qosang

ka baka la ho timetsa

lichaba tseo uena u li etseng?

Kapa ke mang ea ka hlahang e le paki

e u loantšang ho buella ba khopo?

₁₃Ha ho Molimo ka ntle ho uena,

ea hlokomelang tsohle;

ha ho e mong eo u tlamehang

ho mo kholisa

hore ha ua hloka toka ha u ahlola.

₁₄Ha ho khosi leha e le 'musi

ea ka u nyatsang sefahlamahlo

ka baka la bao u ba otlileng.

₁₅Hobane u lokile,

u busa tsohle ka toka;

u talima e le ho sa eeng le matla a hao

ho ahlola ea sa tšoaneleng kotlo.

₁₆Matla a hao ke mohloli oa toka,

'me borena ba hao bo holim'a tsohle

bo etsa hore u qenehele tsohle.

₁₇U bontša matla a hao

ha batho ba belaela

ka ho phetheha ha borena ba hao,

'me u otla ba bo tellang

ha ba ntse ba bo tseba.

₁₈Athe uena ea nang le matla

a makaalo, u bonolo ha u ahlola,

'me u re busa ka qenehelo e kholo;

empa u ka 'na ua sebelisa matla a hao

ha u rata.

₁₉Ka ho etsa joalo u rutile

sechaba sa hao

hore ea lokileng o tšoanetse

ho rata batho,

'me u file bana ba hao tšepo e tletseng

ea hore ka mora' sebe u ba fa

monyetla oa ho baka.

₂₀Ha e le moo u otlile ka hloko

le ka boiphapanyo bo bokaalo

lira tsa bana ba hao

tse tšoanelang lefu,

'me ua li fa nako le monyetla

oa ho furalla bokhopo,

₂₁ke ka hloko e kholo hakaakang

u ahlotseng bana ba hao,

bao u ileng ua tšepisa bo-ntat'a bona,

ka likano le ka lilekane,

lintho tse molemo!

₂₂Ka hona, ka morero oa ho re rupela,

u otla lira tsa rona ka tekanyo,

e le hore re tle re hopole mosa oa hao

ha re ahlola;

'me ha re ahloloa, re tle re lebelle

mohau oa hao.

₂₃Ka baka lena, batho bao,

booatleng ba bona,

ba neng ba phetse ka bophelo

bo sa lokang,

u ile ua ba hlokofatsa

ka manyala a bona;

₂₄hobane ba ile ba khelohela

thoko-thoko,

litseleng tse fosahetseng,

ba nka liphoofolo tse mpehali

'me tse nyonyehang

e le melimo ea bona,

ba thetsahala joalokaha eka ke masea.

₂₅Ka hona, joaloka hola e le bana

ba se nang likelello,

u ile ua ba romella kahlolo e ba eisang.

₂₆Empa ba sa kang ba tsotella

khalemelo eo e ba eisang,

ba ne ba tla thulana le kahlolo

e lokelang Molimo.

₂₇Ba ileng ba tlaloa ke pelo

ka baka la liphoofolo

tse ba hlokofatsang,

ha ba elelloa hore ba otloa ka tsona

tseo ba neng ba li nka e le melimo,

mahlo a bona a tutuboloha, 'me ba

tseba Molimo oa 'nete,

eo pele ba neng ba hana ho mo tseba.

Ka baka leo, kahlolo e boimahali

ea ba oela holimo.