Lapeng la Raguele
1Eitse ha ba fihla Ekebatana, Tobiase a re: “Asariase, ngoan'eso, hl'u nkise ho ngoan'abo rona Raguele hang-hang.” Eaba o mo isa ha Raguele, eo ba mo fumaneng a lutse kantle lebaleng. Ea e-ba bona ba mo lumelisang pele. A araba, a re: “Khotso, bana beso, ke le amohela ka liatla tse peli.” Eaba o ba isa ka tlung ea hae.
2A re ho Edena, mosali oa hae: “Mohlankana enoa o tšoana le ngoan'eso Tobite hakakang!” 3Edena a ba botsa, a re: “Le tsoa kae, bana beso?” Ba araba, ba re: “Re bana ba Nafthali ba kholehong Ninife.” 4A ba botsa hape, a re: “Na le tseba ngoan'abo rona Tobite?” Ba araba, ba re: “E, rea mo tseba.” A tsoela pele, a re: “O nts'a phela joang?” 5Ba re ho eena: “O nts'a iphelela hantle.” Tobiase a ba a eketsa a re: “Ebile ke ntate.”
6Raguele a raoha ka potlako, a mo aka a sekile meokho, 7a re: “Molimo a ke a u hlohonolofatse, ngoan'a ka. U mor'a motho ea khabane, ea molemo. Ke bomalimabe bo bokakang hore motho ea lokileng tjena, ea fanang hakana ka limpho tsa mohau, a foufale.” A kopa ngoan'abo Tobiase ka molala, a lla. 8Le mosali oa hae Edena a llela Tobite, le eena morali oa bona Sara a qala ho mo llela. Joale Raguele a ba hlabela nku e tsoang mohlapeng oa hae: kamohelo ea e-ba e mofuthu.
Hoba ba itlhatsoe 'me ba tole, hoa luloa, hoa jeoa. Tobiase a re ho Rafaele: “Asariase, ngoan'eso, ak'u kope Raguele hore a ntumelle ke nyale khaitseli Sara.” 9Raguele a utloa mantsoe ana, 'me a re ho mohlankana: 10“Itjelle 'me u inoelle, u se itšoenye ka letho, mantsiboeeng ana, hobane ha ho motho ea ka tšoanelang ho nyala morali oa ka, haese uena ngoan'eso. Efela ha ke na tokelo ea ho mo fa e mong ha e se uena, hobane uena u mong ka rona. Empa, ngoan'a ka, ke sitoa ho u patela 'nete. 11Ke se ke ile ka leka ho mo fa banna ba supileng har'a bana babo rona, empa kaofela ba ile ba shoa bosiung bona boo ba keneng kamoreng ea hae ka bona. Hajoale, ngoan'a ka, itjelle 'me u inoelle; Morena o tla le thusa bobeli ba lona”. Tobiase a fetola a re: “Nke ke ka ja leha e le ho noa, pele u lokisa taba ena ea ka.” 12Raguele a re ho eena: “Ke se ke e lokisa. Ho ea ka taelo e bukeng ea Moshe, u fuoa moroetsana: thato ea leholimo ke hore u mo fuoe. Inkele khaitseli ea hao. Ho tloha joale u oa hae, le eena ke oa hao. U mo filoe ho tloha kajeno ho isa khale. Morena Molimo a ke a le atlehise mantsiboeeng ana, ngoan'a ka, a le sitse ka mohau le khotso ea hae.”
Lenyalo la Tobiase le Sara
13Raguele a bitsa morali oa hae Sara. Hoba a atamele, ntat'ae a mo tšoara ka letsoho, a mo nea Tobiase, a re: “Inkele eena, e be mosali oa hao, ho ea ka molao le taelo tse ngotsoeng bukeng ea Moshe. Mo nke, u ikele le eena ha ntat'ao ka letsoalo le khutsitseng. Molimo oa leholimo a ke a le pepe leetong la lona.” 14Eaba o bitsa 'm'a moroetsana; a mo kopa hore a mo tlisetse pampiri ea ho ngola. A ngola lengolo la lenyalo le reng o fa Tobiase Sara e be mosali oa hae, ka ho ea ka taelo ea Molao oa Moshe. 15Ka mora' mona ba qala ho itjella le ho inoella.
16Eaba Raguele o bitsa mosali oa hae Edena, o re: “Ngoan'eso, ak'u lokise kamore e 'ngoe, u ise Sara ka ho eona.” 17Edena a ea ala joalokaha a laetsoe, a ntan'o isa Sara ka moo. A mo llela, 'me eare hoba a itlhakole meokho, a re ho eena: 18“Khothahala, morali. Morena oa leholimo a ke a u sitse ka thabo bakeng sa mahlomola a hao. Khothahala hle, morali.” Eaba oa tsoa.
