1Tobite a re:
“Ho bokoe Molimo ea phelang
ka mehla eohle,
ho bokoe le 'muso oa hae.
2Hobane ke eena ea otlang,
a be a hauhele,
o lihela tlase Qalong ea bafu,
a be a nyolle Timelong e tšabehang;
ha ho letho le ka phonyohang
letsoho la hae.
3“Mo tlotliseng pontšeng ea lichaba,
lona bana ba Iseraele;
hobane ke eena ea le qhalantseng
har'a tsona,
4a ba a le bontša boholo ba hae
hona teng.
Le mo phafe pontšeng ea bohle
ba phelang:
Ke eena Morena le Molimo oa rona,
ke eena Ntat'a rona
le Molimo oa rona, ka mehla eohle.”
5“Leha a le otla
ka baka la makhopo a lona,
o tla le hauhela kaofela ha lona,
a le phuthe lichabeng tsohle
tseo le qhalantsoeng har'a tsona.
6Ha le ka khutlela ho eena
ka pelo ea lona eohle
le ka moea oa lona oohle,
la mo sebeletsa ka botšepehi,
le eena o tla khutlela ho lona,
'me ha a sa tla le patela
sefahleho sa hae.
Bonang seo a le etselitseng sona,
'me le mo lebohe ka lentsoe le phefa.
Bokang Morena oa ho loka,
le phafe Khosi ea ka mehla eohle.
“Ha e le 'na, ke mo leboha
naheng ena ea kholeho;
ke bontša sechaba sa baetsalibe
matla le boholo ba hae.
Lona baetsalibe, khutlelang ho eena,
etsang tse lokileng pel'a hae.
Ke mang ea tsebang,
mohlomong o tla khahloa
ke ho le etsetsa mohau.
7Ha e le 'na, ke phafa Molimo.
'me ke ithabela ka Khosi ea leholimo.
8Boholo ba hae bo be malemeng
a batho bohle,
thoriso ea hae e utloahale Jerusalema.
9“Uena Jerusalema,
motse o halalelang,
Molimo o tla u otla
ka baka la mesebetsi ea bana ba hao,
empa o tla boela a hauhela ba lokileng.
10Leboha Morena ka tšoanelo,
u boke Khosi ea ka mehla eohle,
hore Tempele ea hao
e tle e hahoe bocha ka thabo;
bohle ba kholehong
Morena a tle a ba thabise
ba le ka ho uena;
bohle ba matšoenyehong a tle a ba rate
ba le ka ho uena,
ho isa melokong eohle e tlang.
11“Leseli le khanyang la hao
le tla bonesetsa
likhutlo tsohle tsa lefatše.
Lichaba tse ngata tse tsoang hole
li tla tla li e-tsoa qoleng tsohle
tsa lefatše,
li tl'o aha haufi le moo
Lebitso le halalelang la Morena
le hlonepshoang teng,
li tšoere limpho ka matsoho
ho li nyehela Khosi ea leholimo.
Meloko le meloko e tla bontša
thabo ka ho uena,
motse o khethiloeng o tla tumisoa
ka mehla le mehla.
12“Bohle ba u hlapaolang
ba tla rohakeha;
ba rohakehe bohle ba u timetsang,
ba heletsang marako a hao,
ba ripitlang litora tsa hao
le ba chesang matlo a hao.
Bohle ba u hlomphang
ba tla hlohonolofala ka mehla eohle.
13U ithabele ke hona
ka baka la ba lokileng,
hobane ba tla be ba phuthehile kaofela,
ba boka Morena oa ka mehla eohle.
14“Ba u ratang ba tla ba lehlohonolo,
ba be lehlohonolo
ba thabelang khotso ea hao,
le ba utloang bohloko
ka baka la likotlo tsohle tsa hao,
hobane ba tla ithabela ka uena,
e be lipaki tsa thabo ea hao ka mehla.
15Moea oa ka, boka Morena,
e leng Khosi e kholo,
16hobane Jerusalema e tla hahoa bocha,
e be motse oo Ntlo ea hae
e tla ba ho oona ka mehla eohle.
“Ke tla ba lehlohonolo hakakang,
ha ho ka sala ba bang ba lesika la ka
ho bona letlotlo la hao
le ho roka Khosi ea leholimo.
Likhoro tsa Jerusalema li tla hahoa
ka majoe a safire le emeralde,
marako 'ohle a eona a hahoe
ka majoe a bohlokoa;
litora tsa Jerusalema
li tla hahoa ka khauta,
le liqhobosheane tsa tsona
ka khauta e tšekehileng.
17“Litsela tsa Jerusalema
li tla khabisoa
ka mahakoe le ka majoe a Ofire.
18Likhorong tsa Jerusalema
ho tla betseha lipina tsa nyakallo,
matlung 'ohle a eona ho thoe:
'Alleluia, ho bokoe Molimo oa Iseraele!'
Bao Molimo a ba hlohonolofalitseng
ba tla boka Lebitso le halalelang la hae
ka mehla eohle le ho isa khale.”
