Lengeloi Rafaele lea itsebisa
1Hoba mokete oa lechato o fele, Tobite a bitsa mora oa hae Tobiase, a re ho eena: “Ngoan'a ka, se lebale ho fa motho enoa ea u felehelitseng moputso oa hae; u b'u mo ekeletse.” 2A botsa, a re: “Ntate, ke mo fe moputso o mokae? E ke ke ea e-ba tahlehelo ea letho leha nka mo fa karolo ea bobeli ea lintho tsohle tseo rona le eena re tlileng le tsona. 3O nkhutlisitse ke ntse ke phela hantle, a folisa mosali oa ka, a nthusa ho tla le chelete, a ba a u folisa le uena. Nka mo ekeletsa bokae holim'a moputso oa hae, ha ho le tjee?” 4Tobite a araba, a re: “O lokeloa ke ho fumana karolo ea bobeli ea tsohle tseo a tlileng le tsona, ngoan'a ka.” 5Tobiase a ea 'mitsa, a re ho eena: “Inkele karolo ea bobeli ea tsohle tseo u khutlileng le tsona e le moputso oa hao, 'me u itsamaele ka khotso.”
6Eaba Rafaele o ba bitsetsa ka thoko bobeli ba bona, 'me a re ho bona: “Bokang Molimo, le mo lebohe pontšeng ea bohle ba phelang bakeng sa molemo oo a le etselitseng oona. Mo bokeng 'me le roke Lebitso la hae. Phatlalletsang batho bohle mesebetsi ea Molimo joalokaha e le tšoanelo, 'me le mo lebohe le sa qea-qee. 7Ke ntho e ntle ho boloka lekunutu la khosi, empa ke tšoanelo ho senola le ho tumisa mesebetsi ea Molimo. Mo leboheng ka mokhoa o tšoanelehang. Etsang ho leng hotle, 'me bobe bo ke ke ba le ama. 8Thapelo ea 'nete le mesebetsi ea mohau e etsoang ke ea lokileng li molemo ho e-na le maruo a ea khopo. Ho etsa mesebetsi ea mohau ho molemo ho e-na le ho ipokella ka khauta. 9Ho etsa mosebetsi ea mohau ho pholosa motho lefung, ho mo hlakola libe tsohle tsa hae. Ba etsang mesebetsi ea mohau ba tla phela halelele; 10athe ba etsang sebe le bokhopo ba ipolaea e le bona.
11“Ke tla le bolella 'nete eohle, ke sa le patele letho. Ke se ke itse ke ntho e ntle ho boloka lekunutu la khosi le ho senola mesebetsi ea Molimo ka mokhoa o tšoanelehang. 12Tsebang joale hore ha uena u n'u rapela, le Sara a rapela, e n'e le 'na ea hlahisang lithapelo tsa lona pel'a botlotlehi ba Morena; ke ne ke etsa joalo le ha u n'u pata bafu. 13Mohla u sa kang ua qea-qea ho ema le ho tlohela lijo ho ea pata mofu, ke hona mohla ke ileng ka rongoa ho u nonya. 14Hape Molimo a nthoma ho u folisa uena le Sara, ngoetsi ea hao. 15Ke 'na Rafaele, le leng la mangeloi a supileng a sebeletsang Morena, 'me a hlahang pel'a botlotlehi ba hae.”
16Tobite le Tobiase ba ferekana, ba itihela fatše ka lifahleho ke tšabo. 17Empa Rafaele re ho bona: “Se tšabeng, khotso e ke e be le lona. Bokang Molimo ka mehla eohle. 18Ha ke bile le lona, e n'e se ka baka la ka, empa e n'e le ka baka la thato ea Molimo. Ke eena eo le tšoanelang ho mo boka ka matsatsi 'ohle, ke eena eo le tšoanelang ho mo rorisa. 19Le ne le bona eka kea ja, athe seo le se boneng e ne e le pono feela. 20Joale, bokang Morena, le lebohe Molimo mona lefatšeng. Ha e le 'na, ke se ke nyolohela ho eena ea nthommeng. Hape, ngolang tsohle tse le hlahetseng.”
21Ke ha Rafaele a nyolohela leholimong. Eare ha ba ema, ba se ke ba hlola ba 'mona. 22Ba boka 'me ba rorisa Molimo, ba mo leboha ka baka la mesebetsi e meholo eo a ileng a e etsa ha lengeloi la hae le ntse le iponahalitse ho bona.
