1Ena ke buka ea Tobite, mora oa Tobiele, Tobiele oa Ananiele, Ananiele oa Aduele, Aduele oa Gabaele, oa lesika la Asiele, le oa leloko la Nafthali, 2Tobite eo, tšiung tsa Salemanesere, khosi ea Asiria, a ileng a fallisoa Thisbe, e ka boroa ho Kedeshe-Nafthali, maloting a Galelea, ka holim'a Hasore, sebakanyana ka bophirima, ka nqa ea leboea ho Fogore.
Lilemo tsa ho qala bophelong ba Tobite
3'Na Tobite, ke tsamaile tseleng ea 'nete, ke entse tse lokileng matsatsi 'ohle a bophelo ba ka. Hangata ke fane ka limpho tsa mohau ho bana beso le sechaba sa heso, ba tlisitsoeng kholehong 'moho le 'na Ninife, naheng ea Asiria. 4Bocheng ba ka, ha ke sa le haeso naheng ea Iseraele, leloko lohle la Nafthali, ntat'a rona moholo, le ile la ikarohanya le ntlo ea Davida le Jerusalema, motse o khethiloeng har'a meloko eohle ea Iseraele bakeng sa mahlabelo. Ke hona moo Tempele, eo Molimo a lulang ho eona, e neng e hahiloe teng, ea ba ea khakoleloa meloko eohle e tlang. 5Empa bana beso kaofela, le bohle ba ntlo ea Nafthali, ntat'a rona moholo, bona ba ne ba nyehela sehlabelo pel'a setšoantšo sa namane eo Jeroboame, khosi ea Iseraele, a neng a e entse Dane, lithabeng tsa Galelea.
Botšepehi ba Tobite tumelong
6Hangata ke ne ke ba mong ho ea Jerusalema ka leeto la thapelo, joalokaha molao o sa fetoheng o ne o tlama Baiseraele bohle. Ke ne ke ee ke potlakele Jerusalema ho isa lilopotsiea le matsibolo a mohlape, karolo ea leshome ea liphoofolo le boea ba pele ha ho kutoa. 7Tsena ke ne ke li nea baprista, bara ba Arone, bakeng sa aletare. Ha e le Balevi bao e neng e le basebeletsi Jerusalema, ke ne ke ba nea karolo ea leshome ea veine le koro, ea litholoana tsa mohloare, garnate le tse ling. Ka lilemo tse tšeletseng tse hlahlamanang, karolo e 'ngoe ea leshome ke ne ke e ntša ka chelete, ha ke e-ea Jerusalema, 8ke e fe likhutsana, bahlolohali le balichaba ba phelang har'a Baiseraele. Ka selemo sa boraro, ha ke ne ke ba tlisetsa eona, re ne re etsa mokete oa lijo, ka ho ea ka litaelo tsa Molao oa Moshe le likeletso tsa Debora, 'm'a ntat'a rona moholo Ananiele; hobane ntate o ne a hlokahale, a ntšiea ke le khutsana. 9Ha ke se ke tiile, ka nka mosali lelokong la habo ntate. Ka eena ka ba le mora, 'me ka mo rea lebitso la Tobiase.
Tobite o tšepahala a le kholehong
10Nakong ea kholeho ea Asiria, ka hapuoa 'me ka isoa Ninife. Ha bana beso le bohle ba sechaba sa heso ba ne ba itjella lijo tsa balichaba, 11'na ke ne ke ela hloko ho se li je. 12Kaha ke ne ke hopola Molimo ka pelo ea ka eohle, 13Ea holimo-limo o ile a etsa hore ke khahlehe mahlong a Salemanesere, 'me ka beoa moreki oa lintho tsohle tseo a li hlokang. 14Ho fihlela lefu la hae, ke ne ke ee ke etele Media ho mo rekela lintho; ke be ke siee mekotla ea chelete e ka bang litalenta tse leshome matsohong a Gabaele, ngoan'abo Gabari, motseng oa Ragese e Media.
15Ka morao ho lefu la Salemanesere, mora oa hae Saneheribe a mo hlahlama. Litsela tse lebang Media tsa koaloa, eaba ke se ke sitoa ho ea teng.
Tobite o pata bafu
16Mehleng ea Salemanesere ke ne ke atisa ho fana ka limpho tsa mohau ho ba leloko la heso. 17Ke ne ke ngoathela ba lapileng, ke apesa ba hlobotseng, ke bile ke pata litopo tsa ba sechaba sa heso, ha ke li bona li akhetsoe ka ntle ho marako a Ninife. 18Ke ne ke pata le bona ba bolauoeng ke Saneheribe hoba a khutle Judea, moo a ileng a baleha teng ha Khosi ea leholimo e mo lihela kotlo ka baka la linyefolo tsa hae. Khalefong ea hae o ile a bolaea Baiseraele ba bangata. Ke ne ke nka litopo tsa bona ka lekunutu ho li epela. Saneheribe o ne a li batla, empa o ne a sa li fumane. 19Motho e mong oa Ninife a ea bolella khosi hore ke 'na ea li bolokileng ka sekhukhu. Hoba ke utloe hore khosi e tsebisitsoe, ebile ke batleloa ho bolaoa, ka tšoha 'me ka baleha. 20Thepa eohle ea ka ea haptjoa 'me ea isoa polokelong ea borena; ka se ke ka salloa ke letho, haese Anna mosali oa ka le Tobiase mora oa ka.
Tobite o thusoa ke motsoal'ae
21Ho e-s'o fete matsatsi a mashome a mane ka morao ho tsena, khosi e ile ea bolaoa ke bara ba eona ba babeli; ba ba ba balehela lithabeng tsa Ararate. Asare-Hadone, mora oa eona, a e hlahlama. A khetha Ahikare, mora oa ngoan'eso Anaele, ho ba molebeli e moholo oa lichelete tsa 'muso oa hae 'me a mo nea bolisa ba maruo 'ohle a hae. 22Ke ha Ahikare a mpuella, 'me ka lumelloa ho khutlela Ninife. Tlas'a puso ea Saneheribe, khosi ea Asiria, Ahikare e ne e bile moabi e moholo oa lino tsa khosi, 'moloki oa letšoao la borena, molisa oa maruo le molebeli oa lichelete; a tiisoa boemong bona ke Asare-Hadone. E ne e le oa heso, ngoan'a ngoan'eso.
