TITE 3

₁Hopotsa batho hore eka khona ba ikokobeletse babusi le ba neiloeng matla, ba ba mamele, ba itokisetse mesebetsi eohle e lokileng. ₂Ba se nyefole motho, ba se rate ntoa, ba be mosa, ba be bonolo ho batho bohle.

₃Pele le rōna re ne re le lithoto, re hana ho mamela, re khelohile, re le makhoba a litakatso le a menyaka ea mefuta-futa, re phela ka lōnya le ka mōna, re hloeehile, re hloeane. ₄Empa eare mohla ho bonahalang molemo oa Molimo, Mopholosi oa rōna, le lerato la hae ho batho, ₅a re pholosa, e seng ka baka la mesebetsi e lokileng eo re e entseng, empa e le ka baka la lereko la hae. A re pholosa ka tlhatsuo ea ho tsoaloa bocha, eo Moea o Halalelang o re nchafatsang ka eona. ₆Moea oo Molimo o o theoletse holim'a rōna ka bongata, ka Jesu Kreste Mopholosi oa rōna, ₇e le hore, ha re se re lokafalitsoe ka mohau oa hae, re tle re be majalefa a bophelo bo sa feleng, boo re bo tšepileng. ₈Lena ke lentsoe la 'nete. Nka rata hore ho tsena u se ke ua thekesela, e le hore bohle ba tšepang Molimo ba ikemisetse ho thahasella mesebetsi e metle. Hona ho hotle, 'me ke thuso ho batho.

₉Ha e le likhang tsa bothoto, le litaba tsa melōko ea baholo-holo, le liqabang, le litsekisano ka tsa Molao oa Moshe, u li sesefe. Tse joalo ha li na thuso, ke tsa lefeela. ₁₀Ea bakang likarohano u mo khalemele hanngoe kapa habeli, ebe u khaohana le eena. ₁₁Tseba hore ea joalo o senyehile, ke moetsalibe, o se a ikahlōtse.

₁₂Ha ke rōmela Aretemase kapa Tikikose ho uena, u potlakele ho tla ho 'na mona, Nikopolese, hobane ke hopotse ho qeta mariha teng. ₁₃Hape u potlakele ho thusa Senase le Apolose leetong la bona, ba se ke ba haelloa ke letho. ₁₄Bana babo rōna ba ke ba ithute ho thahasella mesebetsi e metle, ba tle ba thuse moo ho hlokahalang teng, esere ea e-ba batho ba se nang thuso.

₁₅Bohle bao ke nang le bona baa u lumelisa. Le uena u lumelise bao e leng metsoalle ea rōna ka baka la tumelo.

Mohau o ke o be le lōna bohle.