Tumeliso
1'Na Paulosi, mohlanka oa Molimo le moapostola oa Jesu Kreste, ke tšoanetse ho thusa bakhethoa ba Molimo ho lumela le ho tseba 'nete e isang bolumeling, 2e re neang tšepo ea bophelo bo sa feleng. Molimo ea sa thetseng o re tšepisitse bophelo bona, mehla e e-s'o be teng. 3Ka nako ea teng a senola molaetsa oa hae, oo ke tšepetsoeng ho o phatlalatsa ka taelo ea Molimo, Mopholosi oa rōna. 4Kea u lumelisa Tite, ngoan'aka oa sebele tumelong, eo rōna le uena re nang le eona, ke re: Mohau le khotso ea Molimo Ntate le ea Kreste Jesu, Mopholosi oa rōna, li ke li be le uena.
Mosebetsi oa Tite, Kerete
5Ke u siile Kerete ho qetela ho hlophisa tse saletseng, le ho bea baholo motseng o mong le o mong, ho ea kamoo ke u laetseng kateng. 6E mong le e mong oa bona e be motho ea sa nyatseheng, monna ea nang le mosali a le mong; bana ba hae e be balumeli, e se be batho ba hlaha, ba sa mameleng ho hang. 7Eka khona mookameli ea hlokometseng tsa Molimo a se ke a nyatseha. E se be motho ea ikhopolang, kapa sefela-peloana, kapa letahoa, kapa ea leqhōkō, kapa ea ithuisang ka mano. 8Empa a thabele baeti, a rate tse lokileng, a be seli, a loke, a halalele, 'me a be le boitšoaro. 9A khomarele molaetsa oa sebele, o lumellanang le tseo a li rutiloeng. Ka hona a ka tseba ho khothatsa ba bang ka thuto ea 'nete, le ho nyatsa ba e hanyetsang.
10Ho na le ba bangata ba itaolang, ba thetsang ba bang ka lipuo tsa bosaoana, haholo-holo har'a Bajuda ba sokolohileng. 11Eka khona ba joalo ba khutsisoe, hobane ba qhala malapa ka ho ruta tse sa tšoanelang, hore ba ithuise ka mano. 12E mong oa bona, eo e leng moporofeta oa bona, o ile a re:
“Bakerete ke mahata kamehla, ke libatana tse khopo, ke menyollo e botsoa.” 13Bopaki boo ke ba 'nete. Ka lebaka lena u ba khalemele ka thata, e le hore ba tle ba be le tumelo ea 'nete, 14'me ba se ke ba natsa litšōmo tsa Bajuda le litaelo tsa batho ba furallang 'nete. 15Ho ba hloekileng tsohle li hloekile, empa ho ba silafetseng le ho ba sa lumeleng ha ho letho le hloekileng, hobane likelello tsa bona le matsoalo a bona a silafetse. 16Ba bolela hore ba tseba Molimo, empa liketso tsa bona lia latōla. Baa nyonyeha, ba hana ho mamela, ba sitoa ho etsa letho le lokileng.
