SUSANNA 13

₁Ho ne ho le teng motho ea ahileng Babilona, eo lebitso la hae e neng e le Joakime. ₂A nyala mosali ea bitsoang Susanna, morali oa Hilekia, mosali e motle, 'me ea tšabang Morena. ₃Batsoali ba hae e ne e le batho ba lokileng, 'me ba ne ba rupetse morali oa bona ho ea ka Molao oa Moshe. ₄Joakime e ne e le moruihali, 'me o ne a e-na le serapa se phatlaletseng se neng se itšetlehile ka ntlo ea hae; 'me Bajuda ba ne ba tloaetse ho tla ho eena, hobane e ne e le motho ea hlompshoang ka ho fetisisa. ₅Ka selemo seo, baholo ba babeli ba sechaba ba ile ba khethoa ho ba baahloli. Ka bona Morena o ne a re: “Bobe bo ne bo hlaha Babilona, ho baholo bao e neng e le baahloli, ba etsang sa mokana ba busa sechaba.” ₆Hangata batho bana ba ne ba e-tla lapeng, ha Joakime, 'me bohle ba neng ba e-na le linyeoe, ba ne ba e-tla ho bona.

₇Etlare hoba batho bohle ba tsamaee motšeare o moholo, e be moo Susanna a kenang ka serapeng sa monna oa hae ho otlolla maoto. ₈Baholo ba babeli ba ne ba atisa ho 'mona a kena kahare, a ntse a itsamaela kateng, 'me ba qala ho mo lakatsa. ₉Joale ba tšoephola likelello tsa bona, 'me ba etsa hore mahlo a bona a se ke a talima leholimong 'me ba itebatsa likahlolo tse lokileng tsa Molimo. ₁₀Ka bobeli ba imeloa ke lenyora ka eena, empa ha baa ka ba joetsana tsietsi ea bona, ₁₁hobane ba ne ba hlajoa ke lihlong ho pepesa takatso ea bona ea nama ea ho inkela eena. ₁₂Ba mo alosa ka chesehelo, letsatsi ka mora' letsatsi, ho 'mona.

₁₃Ka le leng ba re: “A re ee hae; ke nako ea lijo.” ₁₄Eitse hoba ba tsoe, ba arohana, empa bobeli ba bona ba boea sekoele, 'me ba kopana hape; 'me eare ha e mong a botsa e mong lebaka le mo khutlisitseng, ba bolellana takatso ea bona. Ke moo hammoho ba ileng ba hlopha nako eo ba ka fumanang Susanna a inotši ka eona.

₁₅Ka mohlomong ha ba ntse ba lebeletse letsatsi le lokelang, Susanna a kena joalokaha a tloaetse, a e-na le makhabunyane a mabeli feela, 'me a lakatsa ho tola ka serapeng; hobane ho ne ho hlile ho chesa haholo. ₁₆Ho ne ho se motho haese baholo ba babeli ba ipatileng, 'me ba mo talimile. ₁₇Eaba o re ho makhabunyane a hae: “Ntlisetseng oli le litlolo, 'me le koale heke ea serapa e le hore ke tle ke tole.”

₁₈Makhabunyane a etsa kamoo a laetsoeng kateng; a koala heke ea serapa, 'me a tsoa ka monyako o lehlakoreng, hore a mo tlisetse seo a neng a a laetse sona, 'me ha aa ka a bona baholo, hobane ba ne ba ipatile.

₁₉Ha makhabunyane a se a tsoile, baholo ba babeli ba ema 'me ba mathela ho eena, ba re: ₂₀“Bona, heke ea serapa e koetsoe, ha ho ea re bonang. Rea u rata; ka hona lumela 'me u robale le rona. ₂₁Ho seng joalo, re tla u tsoa ka bopaki ba hore mohlankanyana o n'a e-na le uena, 'me ke ka hona u ileng ua roma makhabunyane a hao.”

₂₂Susanna a sisimoha, 'me a re: “Ke lika-likelitsoe kahohle; hobane ha ke etsa ntho ena, ke lefu ho 'na; 'me ha ke sa etse, ha nka ke ka phonyoha matsohong a lona. ₂₃Ke ikhethela ho se etse le ho oela matsohong a lona, ho e-na le hore ke etse sebe mahlong a Morena.” ₂₄Eaba Susanna o hooa ka lentsoe le phefa, empa baholo ba babeli ba hooa le ho mo feta, ₂₅'me e mong oa bona a matha 'me a bula heke.

₂₆Ha bahlanka ba sebetsang lapeng ba utloa mokhosi ka serapeng, ba itahlela ka monyako o lehlakoreng, ho bona se mo hlahetseng. ₂₇Ha baholo ba bolela litaba tsa bona, bahlanka ba ile ba hlajoa ke lihlong hampe, hobane ha ho letho le kang lena le neng le kile la utluoa ka Susanna.

₂₈Ka letsatsi le hlahlamang ha batho ba phuthehetse ha Joakime, baholo ba babeli ba tla, ba roetsoe ke morero o mobe oa bona hore Susanna a bolaoe. ₂₉Ka pele ho batho bohle ba re: “A ho bitsoe Susanna, morali oa Hilekia, eo e leng mohats'a Joakime.” ₃₀Ka mokhoa o joalo, a ea bitsoa, 'me a tla le batsoali ba hae, bana ba hae le bang ka eena. ₃₁Susanna e ne e le mosali ea bonojoana, 'me ka chebong a le motle haholo. ₃₂Erekaha a ne a ikhurumelitse hlooho ka lesira, banna bao ba khopo ba laela hore lesira le tlosoe, e le hore ba tle ba iketle ka botle ba hae. ₃₃Empa ba lelapa labo le ba bang bohle ba 'monang ba bokolla.

₃₄Eaba baholo ba babeli ba ema ka har'a sechaba, 'me ba bea liatla tsa bona holim'a hlooho ea Susanna. ₃₅Ha e le eena, a bokolla, empa a lelalelitse mahlo leholimong, hobane pelo ea hae e ne e tšepa Morena. ₃₆Baholo ba re: “Ha re ntse re tsamaea ka serapeng re inotši, mosali enoa o ile a kena le makhabunyane a mabeli; a koala heke ea serapa, a ba a qhala makhabunyane. ₃₇Eaba mohlankana ea neng a ntse a ipatile oa mo atamela 'me a robala le eena. ₃₈Re ne re le ntlheng ea serapa, 'me eare ha re bona bokhopo bona, ra mathela ho bona. ₃₉Ra bona ba le 'moho, empa ra hloloa ho tšoara mohlankana, kaha a ne a le matla ho re feta. A bula heke 'me a betseha. ₄₀Eaba re tšoara mosali enoa, 'me ra 'motsa hore mohlankana eo ke mang; empa a hana ho re bolella. Tsena rea li paka.” ₄₁Phutheho ea ba lumela, hobane e ne e le baholo ba sechaba le baahloli, 'me ea mo ahlolela lefu.

₄₂Eaba Susanna o hooa ka lentsoe le phefa, o re: “Oho Morena Molimo oa bosafeleng, ea tsebang tsohle tse patehileng, ea bonang lintho tsohle pele li e-ba teng, ₄₃ua tseba hore batho bana ba fane ka bopaki ba bohata, bo ntsoang; 'me ke mona ke tla shoa, leha ke sa etsa letho la tseo, bokhopong ba bona, ba li qapileng ho ntsoa ka tsona!”

₄₄Morena a utloa sello sa hae, ₄₅'me eare ha a ntse a isoa ka thoko ho ea bolaoa, Molimo a tsosa moea oa mohlankana ea bitsoang Daniele, ₄₆ea ileng a hooa ka lentsoe le phefa, a re: “Ha ke na mali matsohong ka lefu la mosali enoa.”

₄₇Sechaba kaofela sa retelehela ho eena, sa re: “Ho thoe'ng?” ₄₈Eare ha a ema ka har'a bona, a re: “Le lithoto tse kakang, lona bana ba Iseraele, hore ebe le ahlotse morali oa Iseraele le sa hlahloba litaba 'me le sa batla 'nete? ₄₉Khutlelang qalong ea kahlolo, hobane banna bana ba fane ka bopaki ba bohata ka eena.”

₅₀Eaba batho bohle ba boea sekoele ka potlako, 'me baholo ba sechaba ba re ho Daniele: “Tloo u lule har'a rona, u hlahise maikutlo a hao, hobane Molimo o u file boemo bo kang ba baholo.”

₅₁Eaba Daniele o re ho bona: “Ba arohanyeng haholo, 'me ke tla ba hlahloba.” ₅₂Ha ba se ba arohantsoe, a bitsa e mong oa bona 'me a re ho eena: “Uena ea lemaletseng bokhopong, ha lilemo li ntse li e-ea, libe tsa hao joale li hlahetse tseo u 'nileng ua li etsa mehleng e fetileng. ₅₃U ne u ee u lihe likahlolo tse se nang toka, u ahlole ba se nang molato le ho lesa ba molato ho ikela ka bolokolohi, leha Morena a ne a re: ‘Se ahlolele motho ea se nang koli le ea lokileng lefu.’ ₅₄Joale he, haeba ruri u ile ua bona mosali enoa, e ne e le tlas'a sefate sefe moo u ileng ua bona ba le 'moho?” A araba, a re: “Tlas'a leoka.”

₅₅Daniele a re: “Ke hantle haholo. U entse leshano le tla lefshoa ka hlooho ea hao; hobane lengeloi la Molimo le amohetse kahlolo e tsoang ho Molimo, 'me hang-hang le tla u patsola ka lehare.”

₅₆Eaba o 'meha kathoko, a ba laela hore ba tlise e mong. A re ho eena: “Uena lesika la Kanana, 'me e seng la Juda, botle bo u thetsitse, 'me takatso e sothile pelo ea hao. ₅₇Sena ke seo le 'nileng la se etsa ho barali ba Iseraele, 'me bona ka ho le tšaba ba lumellana le lona; empa morali enoa oa Juda o ne a ke ke a mamella bokhopo ba lona. ₅₈Joale he, mpolelle, e ne e le tlas'a sefate sefe moo u ileng ua ba tšoara ba le 'moho?” A araba, a re: “Tlas'a eike.”

₅₉Eaba Daniele o re ho eena: “Ke hantle haholo. Le uena u entse leshano le tla lefshoa ka hlooho ea hao; hobane lengeloi la Morena le u emetse ka sabole ea lona ho u poma koto tse peli, hore le le felise ka bobeli ba lona.”

₆₀Eaba moo phutheho kaofela e hoeletsang ka lentsoe le phefa le ho boka Molimo ea pholosang ba mo tšepang. ₆₁Eaba bohle ba tsohela baholo bao ba babeli matla, bao ka tse tsoang melomong ea bona, Daniele a ileng a bontša hore ke lipaki tsa leshano. ₆₂Ba etsa ho bona joalokaha ba ne ba rerile ka bokhopo ho etsa mohahabo bona; 'me ho ea ka Molao oa Moshe, ba ba bolaea. Ka mokhoa o joalo, mali a se nang koli a pholosoa tsatsing leo. ₆₃Hilekia le mohats'a hae ba roka Molimo ka baka la morali oa bona, Susanna, ba e-na le Joakime, monna oa hae, le bang ka eena bohle; hobane ha ho letho le hlabisang lihlong le ileng la fumanoa ho eena. ₆₄'Me ho tloha mohlang oo, ho ea pele, Daniele a ba le botumo bo boholo har'a sechaba.