SEFILA SA LIFELA 4

₁U motle hakaakang,

uena moratuoa oa ka!

U motle hakaakang!

Mahlo a hao a koahetsoeng

ke lesira a ka maeba,

moriri oa hao

o ka mohlape oa lipoli

ha li lepella Thabeng ea Gileade.

₂Meno a hao a ka mohlape oa linku

li qeta ho kutoa,

li nyoloha

moo li tsoa hlatsuoa teng;

thojana ka seng se tsoetse mafahla,

ha ho le se seng sa tsona

se sa tsoalang.

₃Melomo ea hao

e ka khoele e khubelu,

ho bua ha hao

le hona hoa khahleha;

marama a hao,

a koahetsoeng ke lesira,

a tšoana le khèkhè tsa kharenate,

kharenate e petsotsoe.

₄Molala oa hao

o tšoana le tora ea Davida,

e hahiloeng

ka bokhabane bo boholo;

ho eona ho leketla lithèbè

li le sekete,

kaofela ha tsona

e le lithèbè tsa bahlabani.

₅Matsoele a hao

a ka potsanyane tse peli,

mafahlanyana a tšèpè

a fulang mehalalitoeng.

₆Tsatsi le e-s'o chabe,

meriti e e-s'o honyele,

ke tla nyolohela thabeng

e metseng tlama tsa 'mira,

ke nyolohele leralleng

le metseng tlama tsa mokubetso.

₇Moratuoa,

botle ba hao bo phethehile,

botle ba hao bo hloka sekoli.

₈Tloha le 'na Lebanone,

monyaluoa oa ka,

tloha le 'na Lebanone!

Theoha tlhōrōng ea Amana,

u theohe tlhōrōng ea Senire

le ea Heremone,

u tlohe lilaōng tsa litau,

thabeng tseo mangau

a phelang ho tsona.

₉U hapile pelo ea ka,

uena khaitseli,

u hapile pelo ea ka,

monyaluoa oa ka;

ua e hapa ka ho nthe heli!

ka la moleka,

ka mofōllelo o le mong

oa faha sa molala oa hao.

₁₀Rato la hao le monate hakaakang,

khaitseli, monyaluoa oa ka!

Rato la hao

le monate ho feta veine,

menkoane ea hao

e feta le ea linōko!

₁₁Mahe a linotši

a rotha molomong oa hao,

monyaluoa oa ka,

tlas'a leme la hao

ho tsoa lebese, le mahe a linotsi,

menkoane ea aparo tsa hao

e ka ea Lebanone.

₁₂U rapa se sirelelitsoeng

khaitseli, monyaluoa oa ka;

u liba se hahelelitsoeng,

sa bitieloa.

₁₃Likharenate ke limela

tsa tšimo ea hao,

tholoana tsa tsona.

ka monate, lia babatsoa!

'Masa le linareta

le tsona lia fumanoa.

₁₄Ho metse nareta le saforone,

le lehlaka le sinamone,

le fate tsa mokubetso

ka mefuta ea tsona.

'Mira le lekhala

le tsona li mela moo,

le tlamana tsohle

tse monko o monate.

₁₅U mohloli o noesetsang serapa,

u liba sa metsi a kollang,

a phallang

a e-tsoa koana Lebanone.

₁₆Tsoha uena moea oa leboea,

ak'u tle le uena moea oa boroa!

Puputlelang ka serapeng sa ka,

menkoane ea sona

e phatlallele hohle,

moratuoa a ke a tle

ka rapeng sa hae,

a je tholoana tse monate

ka ho fetisa!