SIRAKA 7

₁Se etse bobe, 'me bobe

bo ke ke ba u oela holimo.

₂Iphuthe pel'a phoso,

'me eona e tla u furalla.

₃Ngoan'a ka, se leme se hlokang toka,

esere ua kotula kotulo

e menahaneng hasupa.

₄Se ipatlele ho Morena

setulo se ka holimo-limo,

leha e le setulo se hlomphehang

ho khosi.

₅U se ke ua iketsa ea lokileng

mahlong a Morena,

leha e le ho khantša bohlale ba hao

ka pele ho khosi.

₆Se ipatlele ho ba moahloli,

esere ua sitoa ho ripitla bokhopo,

kapa ua ba leeme ho motho oa boemo,

'me ka hona ua phareha letheba

seriting sa hao.

₇U se ke ua siteloa sechaba,

'me u se itlontlolle bathong.

₈U se ke ua eketsa ho etsa sebe,

hobane esita le se le seng

se tla u tlisetsa kotlo.

₉U se ke ua re: “Molimo o tla khahloa

ke bongata ba limpho tsa ka,

'me ha ke hlahisa nyehelo

ho Ea holimo-limo o tla e amohela.”

₁₀Se nyahame pelo thapelong ea hao,

se lese ho fana ka limpho tsa mohau.

₁₁Se tlepe litšeho

motho ea mesarelong,

hobane ho teng Ea kokobetsang

le ho phahamisa.

₁₂U se ke ua etseletsa ngoan'eno

ka leshano,

leha e le ho etsa joalo le ho motsoalle.

₁₃Hana ho bua leshano lefe kapa lefe,

hobane temalo ea leshamo

ha e na molemo.

₁₄U se ke ua ea lolo-lolo

phuthehong ea baholo,

leha e le ho ipheta-pheta

thapelong ea hao.

₁₅U se ke ua nena mosebetsi o boima,

kapa mosebetsi oa masimong

o hloliloeng ke Ea holimo-limo.

₁₆Se kene mokhatlong oa baetsalibe;

hopola hore khalefo ha e na ho lieha.

₁₇E-ba moikokobetsi e moholo

hobane kahlolo ea ba se nang Molimo

ke mollo le liboko.

₁₈U se ke ua fetohela motsoalle

oa hao ka baka la chelete;

kapa ngoan'eno ea tšepahalang,

ka baka la khauta ea Ofire.

₁₉U se ke ua hlobohana le mosali

ea bohlale 'me ea molemo,

hobane makhabane a hae

a bohlokoa ho feta khauta.

₂₀U se ke ua tšoara hampe mohlanka

ea phethang mosebetsi oa hae

ka botšepehi,

kapa mohiruoa ea iteletseng uena.

₂₁Rata mohlanka oa hao ea bohlale

ka moea oohle oa hao,

u se ke ua mo tima bolokolohi.

₂₂A, na u na le likhomo? Li alose;

haeba li u buseletsa, li boloke.

₂₃A, na u na le bana? Ba rupele;

etsa hore ba be le mamelo

ho tloha bongoaneng ba bona.

₂₄A, na u na le barali? Baballa

bohloeki ba bona kahohle;

'me u se ke ua ba bokotsa

ho feta tekanyo.

₂₅Neelana ka morali oa hao lenyalong,

'me u tla be u phethile

mosebetsi o moholo;

empa u mo fe monna

ea nang le kutloisiso.

₂₆A, na u na le mosali ea u khahlisang?

U se ke ua mo lahla;

empa se tšepe eo u sa mo rateng.

₂₇Hlompha ntat'ao

ka pelo eohle ea hao,

'me u se lebale mahloko

a pelehi a 'm'ao.

₂₈Hopola hore u n'u tsoaloe

ke batsoali ba hao;

ana u ka ba buseletsa ka'ng

holim'a seo ba u etselitseng sona?

₂₉Ka moea oohle oa hao,

tšaba Morena,

'me u hlomphe le baprista ba hae.

₃₀Ka matla 'ohle a hao,

rata Ea u entseng,

'me u se ke ua furalla

basebeletsi ba hae.

₃₁Tšaba Morena,

'me u hlomphe moprista,

'me u mo fe seabo sa hae

joalokaha se laetsoe,

lilopotsia, nyehelo ea melato,

mpho ea sephaka,

sehlabelo sa khalaletso, lilopotsia

tsa lintho tse halalelang.

₃₂Fa mofutsana mpho ea mohau,

e le hore hlohonolofatso ea hao

e tle e felelle.

₃₃Fana ka matsoho a mabeli

ho bohle ba phelang,

'me u se ke ua tima esita le bafu

lerato la hao.

₃₄U se ke ua furalla ba llang,

empa u utloele ba mesarelong bohloko.

₃₅Se tšabe ho etela bakuli,

hobane ka baka la liketso tse joalo

u tla ratuoa.

₃₆Ho tsohle tseo u li etsang,

hopola pheletso ea bophelo ba hao,

'me u ke ke ua etsa sebe le ka mohla.