Josiea
1Ho hopola Josiea ho monate
joaloka mokubetso,
o lokisitsoeng ka tsebo ea motsoaki;
ho mo bolela ho monate
joaloka mahe a linotši
molomong oa bohle,
le joaloka 'mino moketeng oa veine.
2A latela tsela e nepahetseng
ea ho sokolla sechaba,
'me a tlosa manyala a bokhopo.
3Pelong ea hae a tšepahala ho Morena,
'me mehleng ea batho ba khopo
a matlafatsa borapeli.
Jeremia
4Haese Davida le Hesekiea le Josiea,
litšito tsa ba bang bohle
li bile ngata-ngata,
hobane ba furaletse molao
oa Ea Holimo-limo.
Ka baka leo bokhosi ba Juda ba fela;
5likhosi tsa tella ba bang matla
a tsona,
le tlotla ea tsona ho sechaba
sa balichaba.
6Motse o khethiloeng,
o nang le Sehalalelo, oa chesoa,
'me mapatlelo a oona
a sala a se na batho,
ho ea ka boprofeta ba Jeremia.
7Ba ne ba mo hlokofalitse,
leha a ne a tlotselitsoe boporofeta
a sa le ka popelong ea 'm'ae,
e le hore a motsule, a heletse,
'me a timetse,
le hore a hahe 'me a hlome.
Esekiele
8Ke Esekiele ea boneng
pono ea Tlotla,
eo Molimo a 'montšitseng eona
e le holim'a kariki ea likerubime.
9Molimo a hopola lira
ka ho li romela pula ea likhohola,
'me a etsetsa ba tsamaeang
ka tsela ea 'nete molemo.
Baporofeta ba leshome le metso e 'meli
10E se eka le 'ona masapo a baporofeta
ba leshome le metso e 'meli.
a ka boela a phela
moo a epetsoeng teng,
hobane ba ne ba tšelisa
sechaba sa Jakobo,
'me ba se lopolla
ka tšepo e tiileng ea bona.
Serubabele le Joshua
11Re tla phahamisa Serubabele joang?
O ne a ka reng ea letšoao letsohong
le letona la Morena;
12'me le Joshua mora oa Josadake a le
joalo.
Mehleng ea bona, ba haha Ntlo ea
Morena,
ba mo hahela Tempele e halalelang,
e loketseng ho tlotleha kamehla le
mehla.
Nehemia
13Le teng ke ntho e kholo
ho hopola Nehemia,
ea re tsoselitseng marako
a oeleng a motse,
a a kenya liheke le libere-bere,
'me a tsosa le matlo a rona.
Bapatriareka
14Ha ho ea kang Henoke
ea kileng a boptjoa lefatšeng;
hobane o tlositsoe lefatšeng a phela.
15Hape ha ho monna ea kileng a hlaha
ea kang Josefa,
eo e neng e le moetapele oa bana babo
le setšehetso sa sechaba sa habo;
'me masapo a hae a hlonepshoa.
16Sema le Setha ba hlonepshoa
har'a batho,
empa popong Adama o kaholimo
ho tsohle tse phelang.
