Elia
1Joale ha hlaha Elia,
moporofeta ea joaloka mollo,
lentsoe la hae e le le tukang,
joaloka serumula.
2A lihela batho tlala,
ka cheseho ea hae a fokotsa
palo ea bona.
3Ka taelo ea Morena
a koala maholimo,
'me ka makhetlo a mararo a theolela
mollo o tsoang maholimong lefatšeng.
4U tlotliloe hakaakang, uena Elia,
ka limakatso tsa hao!
Ke mang ea ka ithorisang
ka ho re o tšoana le uena?
uena ea tsositseng motho bafung,
ua mo khutlisa Qalong ea bafu
ka lentsoe la Ea holimo-limo;
6uena ea lahletseng likhosi timelong,
batho ba tlotlehileng ua ba ketola
boemong ba bona;
7uena ea utloileng likhalemo
holim'a Sinai,
le kahlolo tsa phetetso holim'a Horebe;
8uena ea tlotselitseng likhosi
ho ba baphetetsi,
le baporofeta ho ba bahlahlami ba hao;
9uena ea nketsoeng leholimong,
setsokotsaneng sa mollo,
ka kariki e huloang ke pere tsa mollo.
10Ho ngotsoe ka uena
hore u tla tla khalema
ka nako e beiloeng,
ho kokobetsa khalefo ea Molimo
pele e tuka ke bohale,
ho boelanya ntata le mora.
le ho tsosa meloko ea Jakobo.
11Ho lehlohonolo ba u boneng,
le ba ithobaletseng leratong la Molimo.
Le rona re tla phela ruri.
Elisha
12Hoba Elia a nyamele
setsokotsaneng,
Elisha a tlala moea oa hae.
Litšiung tsohle tsa bophelo ba hae,
ha ho 'musi ea kileng a mo sisinya,
leha e le ho mo hlola.
13Ha ho letho le kileng la mo sita,
le lebitleng la hae setopo sa hae
se ne se e-na le matla a ho porofeta.
14Bophelong ba hae
o ne a etsa mehlolo,
le ka mora' lefu la hae liketso tsa hae
ea e-ba limakatso.
15Leha ho le joalo,
batho ha baa ka ba baka,
leha e le ho furalla libe tsa bona,
ho fihlela ha ba haptjoa,
ba tlosoa naheng ea habo bona,
'me ba hasanngoa kahohle lefatšeng.
Sechaba sa sala se se se kae ka palo,
empa se e-na le 'musi
oa ntlo ea Davida.
16Ba bang ba bona ba etsa
ho khahlehang ho Molimo,
empa ba bang ba atisa libe.
Hesekiea le Esaea
17Hesekiea a matlafatsa tšireletso
ea motse oa hae,
'me a hulela metsi a seliba
ka har'a oona,
ka ho fata lefika ka tšepe
le ka ho haha matša a metsi.
18Mehleng ea hae Saneheribe
a futuhela naha;
a roma Rabeshake ea ileng a tla
ka ho sokela ho thuha Sione,
'me a ipabola ka boikhohomoso
ba hae.
19Eaba moo lipelo tsa bona li tšohang
le matsoho a bona a thothomela,
'me ba utloa mahlaba a kang
a basali ba belehang.
20Empa ba ipiletsa ho Morena
ea mohau,
ba phahamisetsa matsoho a bona
ho eena;
'me Ea halalelang kapele a ba utloa
a le leholimong,
'me a ba pholosa ka letsoho la
Esaea.
21Morena a otla liahelo tsa Baasiria,
'me lengeloi la hae la ba rinya;
22hobane Hesekiea o ne a etsa
se khahlang Morena,
'me a itšoarella ka thata litseleng
tsa Davida ntat'ae,
joalokaha a laetsoe ke Esaea
moporofeta,
ea neng a le moholo,
'me a tšepahala
ho tseo a li bontšitsoeng.
23Mehleng ea Esaea
letsatsi le ne le cheche,
ho lelefatsa bophelo ba khosi.
24Ka ho neoa moea o matla a bona
lintho tse tlang ho tla,
'me a tšelisa ba neng ba le bofifing
ba Sione.
25A senola se neng se lokela ho ba teng
ho isa pheletsong ea nako,
le lintho tse patiloeng pele li etsahala.
