Thapelo ea Iseraele
1Re hauhele, oho Morena,
Molimo oa tsohle, 'me re talime;
2kenya tšabo ea hao lichabeng tsohle.
3Phahamisa letsoho la hao
ho otla balichaba,
'me u etse hore li bone matla a hao.
4Joalokaha ba bone khalalelo ea hao
e iponahatsa har'a rona,
ka mokhoa o joalo a re ke re bone
boholo ba hao
bo iponahatsa har'a bona.
5Le bona ba ke ba u tsebe,
joalokaha rona re tseba
hore ha ho Molimo e mong
haese uena, Morena.
6Hlahisa lipontšo tsa hao bocha,
etsa limakatso tse ncha;
tlotlisa seatla sa hao le letsoho
le letona la hao.
7Tsosa bohale ba hao,
'me u tšolle khalefo ea hao;
ripitla mohanyetsi, u fiele sera.
8Akofisa letsatsi, u hopole
nako e beiloeng,
e le hore batho ba bolele
liketso tse matla tsa hao.
9Ea phonyohang a chesoe
ke mollo o bohale,
'me ba hlokofatsang sechaba sa hao
ba timele.
10Buretsa lihlooho tsa babusi
ba lira tsa rona,
ba reng: “Ha ho e mong
haese rona feela.”
11Phutha meloko eohle ea Jakobo,
'me u e buseletse lefa la eona
la mohla monene.
12Hauhela sechaba se bitsoang ka uena,
Morena,
Iseraele eo u mo entseng
ho ba letsibolo la hao.
13Qenehela motse o halalelang oa hao,
Jerusalema, qalo ea phomolo ea hao.
14Tlatsa Sione ka lithoko
tsa mehlolo ea hao,
le Tempele ea hao ka tlotla ea hao.
15Pakela bao u neng u ba bope
tšimolohong,
'me u phethahatse tse porofetiloeng
ka lebitso la hao.
16Putsa ba u lebeletseng,
'me u etse hore baporofeta ba hao
ba fumanehe ba tšepahala.
17Oho Morena, ak'u mamele thapelo
ea bahlanka ba hao
ho latela ho hlohonolofatsoa
ha sechaba sa hao ke Arone,
bohle ba lefatšeng ba tle ba tsebe
hore u Morena, Molimo
oa mengoaha eohle.
Khetho ea mosali
18Mpa e tla amohela lijo
life kapa life,
athe sejo se seng se molemo
ho feta se seng.
19Joalokaha mahalapa a utloa tatso
ea nama ea linyamatsane,
ka mokhoa o joalo kelello e seli
e hlalohanya mantsoe a bohata.
20Motho ea mamene-mene
o baka masoabi,
empa eo e leng khale a li bona
oa 'museletsa.
21Mosetsana o lumela mohlanka
ofe kapa ofe;
empa mohlankana o ikhethela
eo a mo ratang.
22Botle ba mosali bo elisa
sefahleho sa monna,
'me bo mo khahla ho feta
eng kapa eng.
23Haeba mosali eo a le mosa le mohau
ha a bua,
monna oa hae ha ho ea mo fetang
har'a batho bohle.
24Ea nkang mosali o qala ho rua;
o na le mothusi ea mo tšoanelang
le tšiea eo a itšehetsang ka eona.
25Moo ho se nang lekhoakhoa,
lijo tsa serapa li tla senngoa;
moo ho se nang mosali,
monna o tla solla kahohle a se na
khotso.
26Ana ke mang ea ka tšepang
lesholu le matjato
le balehang motseng o mong
ho ea ho o mong?
Ana ke mang ea tla tšepa
motho ea se nang lelapa,
ea robalang kae le kae
moo a phirimeloang teng?
