1Ho lehlohonolo monna
ea nang le mosali ea molemo,
matsatsi a bophelo ba hae
a tla eketseha habeli.
2Mosali oa sebele o thabisa
monna oa hae;
monna oa hae o tla qeta
lilemo tsa hae ka khotso.
3Mosali ea lokileng ke kabelo
ea bohlokoahali,
ke neo e fuoang ba tšabang Morena.
4Leha monna a ka rua
kapa a futsaneha,
pelo ea hae e thabile
'me kamehla sefahleho sa hae se elile.
5Lintho li tharo tse ntšosang,
'me ea bone ke tšaba ho thulana
le eona:
tšenyo ea lebitso har'a motse,
ho khobokana ha letšoele,
le ketseletso,
tseo tsohle e leng tse mpe ho feta lefu;
6empa mosali ea lefufa ke mohloli
oa bohloko ba pelo le masoabi,
'me phafa ea leleme e baka
tsena tsohle.
7Mosali ea khopo e ka joko
e khoehlang;
ho mo nanabela e ka ho tšoara
phepheng.
8Mosali ea tahiloeng o baka khalefo
e kholo,
ha a ka ke a pata boitlontlollo boo
ba hae.
9Botekatse ba mosali bo bonahala
mahlong a hae a tjammeng,
'me o tsejoa ka ho panya-panya ha hae.
10Alosa morali ea setoutu ka thata;
hobane ha u lesa ho etsa joalo,
o tla ipha monyetla.
11Hlokomela mahlo a hae
a se nang hlompho,
se makale ha a u fosetsa.
12Joalokaha moeti ea nyoriloeng
a ahlama,
'me a e-noa metsi afe kapa afe
ao a ka a fumanang,
moroetsana eo o ineella monna
ofe kapa ofe,
'me o bulela metsu eohle
khohlopo ea hae.
13Botle ba mosali
bo thabisa monna oa hae,
'me bohlalefi ba hae
bo ea mo matlafatsa.
14Mosali ea khutsitseng
ke neo ea Morena;
'me ha ho letho le ka fetang
ka bohlokoa mosali ea rupetsoeng
hantle.
15Mosali ea lihlong o phaella
botle holim'a botle,
'me ha ho letho le ka lekanngoang
le mosali ea hloekileng.
16Joaloka letsatsi le chabang
lihlabeng tsa Morena,
bo joalo botle ba mosali ea lokileng
ka tlung ea hae
e hlophiloeng ka makhethe.
17Joaloka lebone le phatsimang
seluloaneng se halalelang,
sefahleho se setle se joalo
seemong se bohehang,
18joaloka litšia tsa khauta
malulong a silefera,
maoto a matle-matle a nang le lirethe
tse tsitsitseng a joalo.
Tse soabisang
28Ntho li peli tse hlabang pelo ea ka,
'me ea boraro ea nkhalefisa:
mohlabani ea tsietsing
ka baka la bofuma;
batho ba bohlale ba nyelisoang;
motho ea furallang ho loka
a ineella sebe,
eo Morena a mo lokisetsang sabole.
29Ho thata ho mohoebi
ho phema liphoso,
le ho sebapatsi ho hloka sebe.
