Sebe
1Ngoan'a ka, na u entse sebe?
Se hlole u pheta,
empa u rapelle libe tsa hao
tsa nako e fetileng.
2Baleha sebeng
joalokaha u baleha noha;
hobane ha u tanakela sebe,
se tla u loma.
Meno a sona ke meno a tau
'me a bolaea batho.
3Ho roba molao ho ka sabole
e ntlha-peli,
leqeba la eona ha le phekolehe.
4Litšoso le botlokotsebe
li tla ripitla moruo;
ka mokhoa o joalo
ntlo ea moikhohomosi e tla ripitloa.
5Thapelo ea mofutsana
e tloha melomong ea hae
ho ea litsebeng tsa Molimo,
'me o tla ahloleloa ka potlako.
6Motho ea hloileng khalemo
o tsamaea mehatong ea moetsalibe,
empa ea tšabang Morena
o tla baka ka pelong ea hae.
7Motho ea matla lipolelong
o tsejoa kahohle;
empa ha motho eo a thella,
ea nang le kutloisiso oa elelloa.
8Motho ea hahang ntlo ea hae
ka chelete ea batho ba bang
o joaloka ea bokellang majoe
bakeng sa lebitla la hae.
9Phutheho ea ba khopo
e ka qubu ea toala,
'me ba tla fella lelakabeng la mollo.
10Tsela ea baetsalibe e bataletse,
empa qetellong ea eona ke mohohlo
oa Qalo ea bafu.
Bohlale le bothoto
11Motho ea bolokang Molao
o laola mehopolo ea hae,
'me tšabo ea Morena
e mo isa bohlaleng.
12Ea seng bohlale a ke ke a rupeloa,
empa ho na le masene a tsoalang
tse babang.
13Tsebo ea motho ea bohlale
e joaloka metsi a moroallo,
'me le boeletsi ba hae
bo joaloka seliba sa bophelo.
14Kelello ea sethoto e joaloka pitsa
e pshatlehileng,
e ke ke ea boloka tsebo ea letho.
15Ha motho ea rutehileng a utloa
polelo e bohlale,
o tla e roka, a be a e phaelle;
ha ea phelang menyakeng a utloa
polelo e joalo, oa e nyatsa,
'me o e betsetsa koana.
16Se phetoang ke sethoto
se ka mojaro leetong,
empa ke ntho e monate ho mamela
puo ea motho ea bohlale.
17Puo ea motho ea nang le kutloisiso
e tla thabeloa phuthehong,
'me ba tla inahana ka mantsoe a hae
ka lipelong tsa bona.
18Joaloka ntlo e fetohileng lesupi,
bo joalo bohlale ho sethoto;
'me tsebo ea motho
ea hlokang kutloisiso
e ipaka ka lipuo tse se nang ntlha.
19Ho motho ea se nang kelello thupelo
e ka mahlahlela a maoto,
e ka lihanaboi tsa matsoho.
20Ha sethoto se qaboha,
letšeho la sona lea utloahala;
athe motho ea seli o bososella
ka marameng.
21Ho motho ea nang le kelello thupelo
e ka mokhabo oa khauta
'me e joaloka sepetja letsohong.
22Leoto la sethoto le ikakhela
ka tlung ea motho,
athe eo e leng khale a li bona
o ema kantle ka hlompho.
23Setlaopa se nyarela ka tlung
se le monyako,
athe motho ea mekhoa e metle
o ema kantle.
24Motho ea se nang mekhoa
o bea tsebe lemating,
athe motho ea seli o fumana
e le boitlontlollo ho etsa joalo.
25Melomo ea basebi e pheta
mantsoe a ba bang,
empa batho ba seli ba imamella
lentsoe ka leng.
26Lithoto li bua pele li inahana,
ba bohlale ba inahana pele ba bua.
27Ha motho ea se nang borapeli
a rohaka mohanyetsi oa hae,
e ka oa ithohaka.
28Mosebi o itšilafatsa moea,
'me o hloehile ho baahisani le eena.
