Ho tseba nako ea ho bua
1Khalemo e teng e sa tleng
ka nako,
'me ho teng khutso e bontšang
motho ea seli.
2Ho molemo hakaakang ho khalema
ho e-na le ho pata khalefo;
'me motho ea ipolelang molato
ha a ka ke a lahleheloa ke letho.
4Joaloka lehaole le lakatsang
ho senya moroetsana,
motho ea batlang
ho fihlela toka ka likhoka o joalo.
5Ho teng motho eo ka ho thola
a fumanoang a le bohlale,
ha e mong a hlouoa
ka baka la bohehle ba hae.
6Ho teng motho ea tholang
hobane a hloka karabo,
ha e mong a thola hobane a tseba nako
eo a ka buang ka eona.
7Motho ea bohlale o tla thola
ho fihlela nako e nepahetseng,
empa setlaopa se itlatlarietsang
se ipuela feela.
8Ea buang ho feta tekanyo
o tla nyonyeha,
'me ea kenang litaba ka sehlotho o tla
hlouoa.
Phetoho ea boemo
9Tsietsi e ka 'na ea u tlisetsa
lehlohonolo,
empa lehlohonolo lona
le ka 'na la u tlisetsa bomalimabe.
10U ka fana ka mpho
e ke keng ea u thusa ka letho,
empa le teng u ka fana ka mpho
e ka u buseletsang habeli.
11E mong o tloha tlotleng
ho ea boemong bo tlase,
ha e mong a tloha kokobetsong
ho ea boemong bo holimo.
12Ho teng motho ea rekang tse ngata
ka chelete e fokolang,
empa o li lefella hasupa kaholimo.
13Ea bohlale o rateloa lipolelo tsa hae,
empa tlhompho e hlahisoang
ke sethoto e ea le moea.
14Mpho ea setlaopa
ha e ka ke ea u thusa ka letho,
hobane mahlong a sona
e talimeha e le kholohali.
15Se fana hanyenyane
'me se omana haholo;
se ahlamisa molomo oa sona
joaloka seboholi.
Kajeno sea alimana,
ka le hlahlamang se re ho khutlisoe;
motho ea joalo o hloehile.
16Sethoto se re: “Ha ke na motsoalle,
'me ha ho teboho ea ketso tsa ka
tse ntle,
Bao ke ba phomosetsang
ba mpua hampe.”
17Ke ba bakae ba tla se soma,
'me ka makhetlo a makae!
Puo e sa nepahalang
18Ho thella letlapeng ho molemo
ho e-na le ho thella ha leleme;
ka mokhoa o joalo ho oela ha ba khopo
ho tla etsahala ka potlako.
19Motho ea se nang mekhoa
o ka tšomo e etsoang
ka nako e sa tšoanelehang,
e tsoang ho ea ho ile melomong
ea ba sa rupeloang.
20Maele a tsoang molomong oa sethoto
a tla lahloa,
hobane ha a boleloe ka nako
e nepahetseng.
21Ho teng motho ea thibeloang
ho etsa sebe ke bofuma ba hae:
'me ka nako ea phomolo
ha a kukuneloe ke letho ka pelong.
22Ho teng motho ea itimetsang
ka baka la ho hlajoa ke lihlong,
'me a itimetsa ka baka la ho tšaba
chebo ea setlaopa.
23Motho ka baka la ho hlajoa
ke lihlong
a ka etsetsa motsoalle litšepiso,
'me ho sa hlokahale a mo etsa sera.
24Leshano ke letheba le lebe ho motho;
'me le tsoa ho ea ho ile melomong
ea ba sa rupeloang.
25Ho molemo lesholu
ho e-na le raleshano oa kamehla,
empa pheletso ea bona bobeli
ke timelo.
26Sebopeho sa raleshano
sea mo tlontlolla,
'me ho hlabisoa lihlong ha hae
ho mo khomarela ho ea ho ile.
Boikarabelo bo bohlale
27Ea bohlale o tla ikekeletsa hlompho
ka mantsoe a hae,
'me motho ea nang le kutloisiso o tla
khahlisa batho ba boholong.
28Ea lemang tšimo ea hae o tla chaea,
'me ea khahlisang batho ba boholong
o tla tšoareloa tlolong ea molao.
29Liphomosetso le limpho li foufatsa
mahlo a ba bohlale,
li ba koala molomo ho ba sitisa
ho khalemela.
30Bohlale bo patehileng
le letlotlo le patiloeng,
bobeli ba tsona li na le thuso efe?
31Ho molemo motho ea patang
bothoto ba hae,
ho e-na le motho ea patang
bohlale ba hae.
