SIRAKA 9

₁Se boulele mohats'a hao

eo u mo ratang,

esere a ithuta ka uena se ka bang

kotsi ho uena.

₂Se ineele ho mosali

hoo a ka bang le matla holim'a hao.

₃U se ke ua tloaelana le letekatse,

esere ua oela marabeng a lona.

₄U se ke ua matha le mosetsana

oa sebini,

esere a u hohela ka ho u hapa

maikutlo.

₅Se tjamele moroetsana hakaalo-kaalo,

esere ua khoptjoa,

'me la oeloa ke kotlo bobeli ba lona.

₆Se ineele ho matekatse,

esere ua senyeheloa ke lefa la hao.

₇U se ke ua 'na ua talima kahohle

mapatlelong a motse,

leha e le ho phaila likarolong tsa oona

tse se nang batho.

₈Se talime mosali ea fahleho se setle

'me u se tjamele botle ba mosali

oa motho e mong.

Ba bangata ba ile ba khelosoa

ke botle ba mosali,

bo ileng ba hotetsa lerato

joaloka mollo.

₉Le ka mohla u se lule

le mosali ea nyetsoeng

kapa ua ithabisa le eena

moketeng oa lino;

esere pelo ea hao ea sekamela ho eena,

'me litakatso tsa hao

tsa u isa timelong.

₁₀Se furalle motsoalle oa khale,

hobane e mocha ha a ka ke a bapisoa

le eena.

Motsoalle e mocha e ka veine e ncha,

eo u tla latsoa bomonate ba eona

ha e se e le ea khale.

₁₁U se ke ua honohela katleho

ea moetsalibe,

hobane ha u tsebe hore na pheletso

ea hae e tla ba efe.

₁₂U se ke ua khahloa ke se khahlang

ba se nang Molimo;

hopola hore ba ke ke ba phema kotlo

ho isa lefung.

₁₃Iphuthe ho motho ea nang

le matla a ho bolaea,

'me ha u ka ke ua kokonoa

ke tšabo ea lefu.

Empa haeba u ea ho eena,

u se ke ua etsa phoso,

esere a u bolaea.

Tseba hore u tsamaea har'a maraba,

le hore u ntse u le lintšing tsa lefu.

₁₄Ka ho ea ka matla a hao,

u tsebisise baahisani le uena,

'me u eletsane le batho ba bohlale.

₁₅Qoqa le batho ba nang le kutloisiso,

'me kamehla seo u buang ka sona

e be Molao oa Ea holimo-limo.

₁₆Batho ba lokileng

e ke e be balekane ba hao lijong,

'me seo e leng boithoriso ba hao

e be tšabo ea Morena.

₁₇Mosebetsi o tla roriseha

ka baka la tsebo ea motho ea o

entseng,

'me moetapele o tla pakoa bohlale

ke lipolelo tsa hae.

₁₈Lehehle le tla tšajoa

motseng oa habo lona,

'me moitlatlarietsi o tla hlouoa.