SIRAKA 0
Selelekela sa mofetoleli
1Molao, Baporofeta le bangoli ba ileng ba ba hlahlama, ba re sietse lithuto tse ngata tsa bohlokoa, tseo ka baka la tsona re tšoanetseng ho rorisa tsebo le bohlale ba Iseraele. Empa ha ho lekane hore ba balang Mangolo ba iphumanele tsebo bakeng sa bona feela; ba ratang boithuto e ka khona ba thuse le batho ba bang ba kathoko ka tseo ba li bolelang kapa ho li ngola. Ke ka hona ntate moholo, Jesu, a neng a ineela haholo ho bala Molao, Baporofeta le libuka tse ling tsa baholo-holo ba rona. Hoba e be setsebi sa tsona, a ba le mohopolo oa ho ngola buka ea hae hore a tsebe ho abela ba bang tsebo le bohlale; e le hore bohle ba ratang ho ithuta, 'me ba chesehella litaba tsena, ba be le hona ho phela ho ea ka Molao hantle ho feta.
A nke ke le khothaletse hee, hore le bale buka ena ka maikutlo a matle le hloko. Le ke le nkinele matsoho metsing, moo le ka fumanang ke sitiloe ho hlalosa mantsoe a mang, leha ke itekile hakaalo. Se ngotsoeng ka Seheberu ka mehla se ke ke sa nyalana hantle le se fetoletsoeng puong e 'ngoe. Hona ke 'nete, e seng bukeng ena feela; empa le tsona liphetolelo tsa Molao le Baporofeta le libuka tse ling, li fapa-fapane le tse ngotsoeng ka Seheberu.
Ka na ka ba Egepeta selemong sa mashome a mararo a metso e robeli sa puso ea khosi Eueregetese, 'me ka hlola teng nakoana. Ha ke ntse ke le moo, ke ile ka ba le monyetla oa ho ithuta haholo. Ka ba ka fumana e le ntho e hlokahalang haholo hore ke itahlele ka setotsoana phetolelong ea buka e latelang. Ho tloha nakong ena, ka sebetsa nyene le bosiu, ka matla 'ohle a ka, ho qeta buka ena le ho e phatlalletsa bohle, le ba phelang naheng tse ling, ba ka lakatsang ho ithuta, e le hore ba tsebe ho phela ka mokhoa o lumellanang le Molao oa Moshe.
© Bible Society of South Africa 1989. Used with permission. All rights reserved.
