Boase o nyala Ruthe
1Boase a ea khorong ea motse, a lula teng. Mong ka eena, eo Boase a ileng a bua ka eena, a fihla. Boase a re ho eena: “He monna, ak'u fapohele le koano, u lule mona pel'a ka.” Eo a tla, a lula fatše. 2Boase a bitsa baholo ba leshome ba motse oo, 'me a re ho bona: “Lulang mona.” Eaba baa lula. 3Joale Boase a re ho monna ea tsoalanang le eena: “Naomi ea khutlileng naheng ea Moabe, o rekisa naha eo e neng e le ea ngoan'abo rōna, Elimeleke. 4Ke fumane ho le molemo hore ke u bolelle taba ena, ke re: ‘Reka naha eo moo sechaba sa heso le baholo ba sona ba leng teng. Haeba u e lopolla, e lopolle; le teng ha u sa e lopolle, mpolelle, e le hore ke tsebe, hobane ha ho e mong ea ka e lopollang haese uena, kapa 'na, hobane kea u hlahlama.’ ”
Monna eo a re: “Ke tla e lopolla.”
5Empa Boase a tsoela pele, a re: “Mohla u rekang naha ena ho Naomi, u tla e rekella le Ruthe oa Moabe, e leng mosali oa mofu, e le hore u tsose lebitso la mofu naheng eo a e jeleng lefa.”
6Eaba eo mong ka eena o re: “Haeba ho tjena, nke ke ka e lopolla, esere ka senya lefa leo e leng la ka. Kaha nke ke ka e lopolla, uena itopollele eona.”
7Mehleng ea pele e ne e le moetlo oa Baiseraele, hore litabeng tsa ho lopolla kapa tsa ho ananya, motho a rōle moqathatso oa hae, a o nee eo ba rekisetsanang le eena. Ona e ne e le oona mokhoa oa ho etsa bopaki ho Baiseraele. 8Ka baka leo, eo mong ka eena a re ho Boase: “Uena, ithekele eona.” Eaba o rōla moqathatso oa hae.
9Boase a re ho baholo le ho sechaba sohle: “Kajeno le lipaki tsa hore ke rekile ho Naomi tsohle tseo e neng e le tsa Elimeleke, le tsa Kilejone, le tsa Mahelone. 10Le bile le lipaki hore ke reka le Ruthe oa Moabe, mohlolohali oa Mahelone, hore e be mosali oa ka, ke tle ke tsose lebitso la mofu naheng eo a e jeleng lefa, e le hore lebitso la mofu le se ke la fela har'a bana babo, le motseng oa habo.”
11Batho bohle ba neng ba le khorong ea motse, ba re: “Re lipaki!”
Baholo ba re: “Morena a ke a etse hore mosali enoa ea tla kena ka tlung ea hao, a ke a be joaloka Ragele le Lea, ba neng ba tsoalle Iseraele bana. U ke u atlehe Eferata, 'me u tume Betlelehema. 12Bana bao Morena a tla u fa bona ka mosali enoa, ba ke ba be joaloka bana ba Perese, bao Tamare a neng a ba tsoalle Juda.”
Boase le litlōhōlō tsa hae
13Boase a nka Ruthe ea e-ba mosali oa hae. Boase a kena likobong tsa hae, Ruthe ea e-ba moimana, 'me a tsoala mora. 14Basali ba re ho Naomi: “Kajeno ho bokoe Morena, ea sa kang a u tlohela u se na mojalefa. Moshanyana enoa a ke a tume naheng ea Iseraele. 15O tla u tšelisa, a u fepe lilemong tsa botsofali ba hao. Ngoetsi ea hao e u rata haholo, 'me e molemo ho uena ho feta bara ba supileng.” 16Naomi a sika lesea, 'me ea e-ba eena mohōlisi oa lona.
17Basali ba ahisaneng le Naomi ba rea moshanyana lebitso, ba re: “Naomi o tsoaletsoe mora,” 'me ba mo rea lebitso la Obede. Ke eena ntat'a Jese, ea tsoetseng Davida.
Lelōko la Davida
18Tsena ke litlōhōlō tse Perese: Perese a tsoala Heserone; 19Heserone a tsoala Rama; Rama a tsoala Aminadabe; 20Aminadabe a tsoala Naheshone; Naheshone a tsoala Salemone; 21Salemone a tsoala Boase; Boase a tsoala Obede; 22Obede a tsoala Jese, 'me Jese a tsoala Davida.
