Mohlala oa Aborahama
1Joale re tla botsa, re re: Na Aborahama, moholo-holo oa rōna, o iphumanetse eng ka boeena? 2Haeba Aborahama a lokafalitsoe ka baka la liketso tsa hae, o na le seo a ka ithorisang ka sona, empa a ke ke a ithorisa pel'a Molimo. 3Ana Mangolo a re'ng? A re: “Aborahama o ile a lumela ho Molimo, 'me hoo a ho balloa e le ho loka.”
4Ha motho a sebelitse, moputso oa hae ha o baloe e le mpho, empa o baloa e le seo a se sebelelitseng. 5Empa ea sa sebetseng, a mpa a lumela ho ea lokafatsang ea khopo, o balloa tumelo ea hae e le ho loka. 6Le eena Davida o bua ka lehlohonolo la motho eo Molimo a 'mallang ho loka a sa re letho ka liketso tsa hae, ha a re:
7“Ho lehlohonolo
ba tšoaretsoeng litlōlo tsa bona,
le bao libe tsa bona li hlakotsoeng;
8ho lehlohonolo motho
eo Morena a sa tl'o 'malla sebe.”
9Ebe lehlohonolo lee ke la ba bōlōtseng feela, kapa le la maqai? Re re: “Aborahama o ile a balloa tumelo ea hae e le ho loka.” 10Joale o ile a e balloa neng? A se a bōlōtse kapa e sa le leqai? A e-s'o bōlle, e sa le leqai. 11Hamorao a amohela letšoao la lebōllo ho paka ho loka ha hae, hoo a ho fihletseng ka tumelo a e-s'o bōlle. Kahoo ea e-ba ntat'a bohle ba lumelang leha ba sa bōlla, hore ba tle ba balloe ho loka. 12Hape ke ntat'a ba bōlōtseng, e seng feela hobane ba bōlōtse, empa e le hobane ba latela mehlala ea tumelo eo ntat'a rōna Aborahama a bileng le eona a e-s'o bōlle.
Tšepiso ea Molimo e phethahala ho ea lumelang
13Tšepiso ea hore Aborahama e tla ba mojalefa oa lefatše ha ea ka ea etsetsoa eena, kapa litlōhōlō tsa hae, ka baka la Molao, empa ka baka la ho loka ho tsoang tumelong. 14Ha majalefa e le majalefa ka baka la Molao, tumelo e fetoha lefeela, 'me tšepiso ha e sa na thuso, 15hobane Molao o tlisa khalefo ea Molimo; athe moo ho se nang molao, tlōlo ea molao ha e eo.
16Ka baka leo, majalefa ke majalefa ka baka la tumelo, e le hore ka mohau oa Molimo tšepiso e tle e akareletse le litlōhōlō tsohle tsa Aborahama, e seng feela tse tlas'a Molao oa Moshe, empa e leng tse nang le tumelo e kang ea Aborahama, ntat'a rōna bohle, 17joalokaha ho ngotsoe, ho thoe: “Ke u entse ntat'a lichaba tse ngata.” Ke ntat'a rōna pel'a Molimo eo a lumetseng ho eena, ea tsosang bafu, le ea laelang tse sieo joaloka hoja li le teng.
18Leha lebaka la ho tšepa le ne le le sieo, Aborahama o ile a lumela ka tšepo hore e tla ba ntat'a lichaba tse ngata, ho ea ka se boletsoeng, ha ho thoe: “Litlōhōlō tsa hao li tla ba kaalo.” 19Ha aa ka a fokola tumelong, ha a nahana hore e se e le mobu, kaha a ne a le lilemo tse ka bang lekholo, le hore Sara a ke ke a hlola a pepa. 20Ha aa ka a belaela tšepiso ea Molimo ka ho se lumele, empa a matlafatsoa ke tumelo, a tlotlisa Molimo. 21O ne a kholisehile ka botlalo hore seo Molimo a mo tšepisitseng sona o na le matla a ho se etsa. 22Ka baka leo, hona a ho balloa e le ho loka. 23Joale, hore tumelo o e baletsoe e le ho loka, ha hoa ngoloa ka baka la Aborahama feela, 24empa ho ngotsoe ka baka la rōna, ba seng ba tla e balloa, ba lumelang ho ea tsositseng Jesu, Morena oa rōna, bafung, 25ea ileng a neeloa lefu ka baka la libe tsa rōna, 'me a tsosoa hore re tle re lokafatsoe.
