Ho oa ha Babilona
1Kamorao ho tsena ka bona lengeloi le leng le theoha leholimong. Le ne le e-na le matla a maholo, 'me tlōtla ea lona ea bonesetsa lefatše lohle. 2La hōoa ka lentsoe le matla, la re:
“E oele! E oele! Babilona e kholo!
E fetohile leaho la bademona,
setšabelo sa meea eohle e litšila,
le sa linonyana tsohle tse litšila,
tse hloeehang.
3Ke hobane e noesitse
lichaba tsohle joala
ba bohale ba bohlola ba eona.
Likhosi tsa lefatše
li entse bohlola le eona,
'me bahoebi ba lefatše
ba ruisitsoe
ke boholo ba mouno oa eona.”
4Ka boela ka utloa lentsoe le leng le tsoang leholimong, le re:
“Tsoang Babilona,
lōna sechaba sa ka,
esere la ba le kabelo
libeng tsa eona,
kapa la fumana karolo
ea likotlo tsa eona.
5Libe tsa eona li entse mohlomèlo
o fihlang leholimong,
'me Molimo o hopotse
makhopo a eona.
6E etseng
joalokaha le eona e le entse;
le e buseletse habeli
ho ea ka mesebetsi ea eona.
E qhatsetseng habeli senoelong
seo e le qhatselitseng ho sona.
7Le e nee tlhōkōfatso
le mahlomola a lekanang
le boithoriso ba eona;
le boithabiso ba eona,
hobane ka pelong ea eona, e re:
‘Ke lutse teroneng
ke le mofumahali,
ha ke mohlolohali,
'me ha nka ke
ka tseba mahlomola.’
8Ka baka leo,
likotlo tsa eona li tla e tlela,
li e tlele ka tsatsi le leng,
lefu, mahlomola, le tlala,
'me e tla chesoa lore!
Hobane Morena Molimo
ea e ahlōlang o matla.”
9“Likhosi tsa lefatše, tse entseng bohlola le eona, tsa phela ka boithabiso le eona, li tla e llela, li e hlomohele, ha li bona mosi oa ho chesoa ha eona. 10Li tla ema hōle, ka baka la ho tšaba tlhōkōfatso ea eona, li re:
“ ‘U malimabe! U malimabe!
Uena Babilona,
motse o moholo, motse o matla!
Kahlōlo ea hao e phethahalitsoe
ka nako ea hora feela!’
11“Bahoebi ba lefatše ba tla e llela, ba e hlomohele, hobane ha ho sa le ea rekang thepa ea bona: 12thepa ea khauta, le ea silefera, le ea mabenyane a bohlokoa, le ea mahakoe a bohlokoa, le ea masela a matle-matle, le a perese, le a sileka, le a mafubelu, le ea mahong 'ohle a bohlokoa, le ea tsohle tse entsoeng ka manaka a tlou, le tsohle tsa mahong a bohlokoa, le tsa lethose, le tsa tšepe, le tsa mahakoe, 13le linōko tsa sinamone le tsa amone, le makhapetla a lifate a monko o monate, le setlolo, le mokubetso, le veine, le ole, le phofo e thumisehileng, le koro, le likhomo, le linku, le lipere, le likariki, le makhoba, le batšoaruoa.
14“ ‘Tsohle tseo
u neng u li labalabela li ile;
tsohle tsa boithabiso,
tse phatsimang,
li u hlakohile;
ha u ka ke ua hlola u li fumana
le ka mohla.’
15“Bahoebi ba neng ba hoeba ka tsena, ba ruisitsoeng ke Babilona, ba tla ema hōle, ka baka la ho tšaba tlhōkōfatso ea eona. Lillong le mahlomoleng 16ba tla re:
“ ‘Ho malimabe! Ho malimabe!
Motse o moholo,
o neng o khabile
ka masela a matle-matle,
le a perese, le a mafubelu;
o neng o khabisitsoe ka khauta,
le ka mabenyane a bohlokoa,
le ka mahakoe a bohlokoa!
17Empa leruo le lekaalo le felisitsoe,
la felisoa ka nako ea hora feela!’
“Batsamaisi bohle ba likepe, le bohle ba nkang maeto ka likepe, le basesisi ba tsona, le bohle ba phelang ka ho sebetsa leoatleng, ba ne ba eme hōle. 18Eare ha ba bona mosi oa ho chesoa ha eona, ba hōoa, ba re: ‘Na ho kile ha e-ba le motse o kang motse o moholo oo?’ 19Ba itšèla ka lerōle lihloohong, ba hōoa, ba lla, ba hlomoha, ba re:
“ ‘Ho malimabe! Ho malimabe!
Motse o moholo,
moo bohle,
ba neng ba e-na le likepe leoatleng,
ba ileng ba ruisoa
ke leruo la oona!
Empa o felisitsoe
ka nako ea hora feela!
20Uena leholimo, le lōna bahalaleli,
le baapostola, le baporofeta,
thabang ke hona,
hobane Molimo o le ahlōletse
ka ho ahlōla motse oo!’ ”
21Joale lengeloi le matla la nka lejoe le kang leloalahali, la le akhela leoatleng, la re:
“Babilona, motse o moholo,
e tla akheloa tlase
ka sefutho se tjena,
'me ha e ka ke ea hlola
e bonoa hape.
22'Mino oa baletsi ba liharepa,
le oa libini,
le oa makolilo, le oa literompeta,
ha o ka ke oa hlola
o utloahala ha hao.
Setsebi sa mosebetsi ofe kapa ofe
ha se ka ke sa hlola
se bonoa ha hao.
Molumo oa leloala
ha o ka ke oa hlola
o utloahala ha hao.
23Leseli la lebone
ha le ka ke la hlola
le khanya ha hao.
Lentsoe la monyali
ha le ka ke la hlola
le utloahala ha hao.
Bahoebi ba hao
e ne e le mahosana a lefatše,
'me ka boloi ba hao
ua thetsa lichaba tsohle.
24Babilona ho fumanoe mali
a baporofeta, le a bahalaleli,
le a bohle
ba ileng ba bolaoa lefatšeng.”
