Seotsoa se seholo le sebatana
1Joale ha tla le leng la mangeloi a supileng, a nkileng mafisoana a supileng, la bua le 'na, la re: “Tloo, ke u bontše kahlōlo ea seotsoa se seholo, se ahileng lebōpong la leoatle, 2seo likhosi tsa lefatše li entseng bohlola le sona, se tahisitseng baahi ba lefatše ka joala ba bootsoa ba sona.”
3Lengeloi leo la nkisa feelleng ka moea, 'me ka bona mosali ea palameng sebatana se sefubelu, se ngotsoeng kamahohle mabitso a nyefolang, se nang le lihlooho tse supileng le linaka tse leshome. 4Mosali eo o ne a apere liaparo tse perese le tse khubelu, a ikhabisitse ka khauta, le ka mabenyane a bohlokoa, le ka mahakoe. Ka letsohong la hae o ne a tšoere senoelo sa khauta, se tletseng manyala le litšila tsa bootsoa ba hae. 5Phatleng ea hae ho ne ho ngotsoe lebitso le fupereng sephiri: “Babilona e kholo, 'm'a liotsoa tsohle le manyala 'ohle a lefatše.” 6Ka bona mosali eo a tahiloe ke mali a bahalaleli le ke mali a lipaki tsa Jesu.
Eitse ha ke 'mona, ka hlolloa haholo. 7Eaba lengeloi le re ho 'na: “U hloletsoe ke'ng? Ke tla u hlalosetsa sephiri sa mosali, le sa sebatana seo a se palameng, se nang le lihlooho tse supileng le linaka tse leshome. 8Sebatana seo u se boneng se ne se le teng, empa ha se sa le eo; feela se sa tla nyoloha mohohlong o se nang pheletso, ebe se ea timelong. Baahi ba lefatše, bao mabitso a bona a sa kang a ngoloa bukeng ea bophelo ho tloha ha lefatše le theoa, ba tla hlolloa ha ba bona sebatana, hobane se ne se le teng, feela ha se sa le eo, empa se tla khutla.
9“Mona ho batleha kelello e nang le bohlale. Lihlooho tse supileng ke lithaba tse supileng, tseo mosali eo a ahileng holim'a tsona. Hape ke likhosi tse supileng; 10tse hlano tsa tsona li se li oele, ea botšelela e ntse e busa, ea bosupa e sa tla tla. Empa mohla e tlang e tla ba teng ka nakoana feela. 11Sebatana se neng se le teng, se seng se le sieo, ke khosi ea borobeli, e balelloang le tse ling tse supileng, 'me e eang timelong.
12“Linaka tse leshome tseo u li boneng ke likhosi tse leshome, tse e-song ho buse, empa tse tla ba le kabelo pusong ea sebatana ka nako ea hora e le 'ngoe feela. 13Likhosi tsena li na le morero o le mong, e leng ho sebeletsa sebatana ka matla a tsona le ka borena ba tsona. 14Li tla loantša Konyana, empa Konyana e tla li hlōla, hobane eona ke Morena oa marena, le Khosi ea likhosi. Ba bitsitsoeng, ba khethiloeng, ba tšepahalang, le bona ba tla hlōla hammoho le eona.”
15Lengeloi la nt'o re ho 'na: “Leoatle leo u le bonang, moo seotsoa se ahileng teng, ke lichaba, le matšoele, le merabe, le ba lipuo-puo. 16Linaka tse leshome tseo u li boneng holim'a sebatana, le sona sebatana, li tla hloea seotsoa, li se amohe tsohle, li se hlōbōlise. Li tla ja nama ea sona, li se chese mollong. 17Molimo o kentse lipelong tsa tsona thato ea ho phetha morero oa hae, e leng morero o le mong, oa ho sebeletsa sebatana ka borena ba tsona, ho fihlela lipolelo tsa Molimo li phethahala. 18Mosali eo u 'moneng ke motse o moholo, o busang likhosi tsa lefatše.”
