Mosali le khanyapa
1Joale leholimong ha hlaha pontšo e kholo: Mosali ea apereng letsatsi, khoeli e le katlas'a maoto a hae, a bile a e-na le mofapahlooho oa linaleli tse leshome le metso e 'meli hloohong. 2E ne e le moimana. A bokollisoa ke mahlōkō a pelehi. 3Ha hlaha pontšo e 'ngoe hape leholimong. E ne e le khanyapa ea tonana, e khubelu, e lihlooho tse supileng, le linaka tse leshome, le mefapahlooho e supileng lihloohong tsa eona. 4Ka mohatla oa eona e ne e hulanya karolo e le 'ngoe ho tse tharo ea linaleli tsa leholimo, 'me ea li lahlela lefatšeng. Khanyapa ea fihla ea ema kapele ho mosali ea makhatheng a ho beleha, e le hore e tle e koenye ngoana oa hae hang hoba a belehuoe. 5A beleha mora, ngoana e motona, ea tlang ho busa lichaba tsohle ka lere la tšepe. Eaba ngoana eo oa hae o nkeloa ho Molimo, teroneng ea hae. 6Mosali eena a tšabela feelleng, moo Molimo a neng a mo lokiselitse sebaka teng, hore a tle a feptjoe ka matsatsi a sekete le makholo a mabeli le mashome a tšeletseng.
7Eaba leholimong ho qhōma ntoa: Mikaele le mangeloi a hae a loana le khanyapa. Khanyapa le eona ea itoanela e e-na le mangeloi a eona, 8empa ea hlōloa, 'me ea tebeloa leholimong le mangeloi a eona. 9Ea liheloa fatše khanyapa ea tonana, nōha ea khale, e bitsoang Diabolosi le Satane, mokhelosi oa lefatše lohle; ea liheloa lefatšeng 'moho le mangeloi a eona.
10Leholimong ka utloa lentsoe le phahameng, le re:
“Joale tlhōlo, le matla, le puso,
e se e le tsa Molimo oa rōna,
le borena ke ba Mesia oa hae,
hobane ho lihetsoe fatše
moqosi oa bana babo rōna,
ea neng a ba qosa
kapele ho Molimo oa rōna,
motšeare le bosiu.
11Bona ba mo hlōtse
ka mali a Konyana,
le ka lentsoe leo ba le pakileng,
'me ba ba ba e-shoa
ba sa qenehele bophelo ba bona.
12Kahoo thabang, lōna maholimo,
lōna ba ahileng ho 'ona.
Ho malimabe
lōna lefatše le leoatle,
hobane Diabolosi
o theohetse ho lōna
ka bohale bo boholo,
a tseba hore nako ea hae
e se e le khutšoanyane.”
13Eare ha khanyapa e lemoha hore e lihetsoe lefatšeng, ea lelekisa mosali ea belehileng ngoana e motona. 14Empa mosali a neoa mapheo a mabeli a ntsu e kholo, hore a tle a fofele setšabelong sa hae, feelleng, moo a tla feptjoa teng ka selemo se le seng, le ka lilemo tse peli le halofo hape, hōle le nōha. 15Ka molomo oa eona, nōha ea tšoela metsi a phallang kamora' mosali joaloka a nōka, hore a tle a mo nke. 16Empa lefatše la thusa mosali, la ahlama, 'me la metsa nōka eo khanyapa e e tšoetseng ka molomo oa eona. 17Khanyapa ea halefela mosali, 'me ea loantša litlōhōlō tsohle tsa hae, e leng ba bōlōkang litaelo tsa Molimo, ba nang le bopaki ba Jesu. 18Eaba e il'o ema lebōpong la leoatle.
