LIPESALEMA 91

₁Ea phelang tšireletsong

ea Ea Holimo-limo,

ea ahileng moriting

oa Ea Matla 'ohle,

₂o re ho Morena:

“U setšabelo sa ka

le qhobosheane ea ka,

Molimo oa ka eo ke mo tšepang.”

₃Ke eena ea tla u tšoasolla

lerabeng la setsomi,

le lefung le timetsang la seoa.

₄O tla u koahela ka masiba a hae,

u tšabele tlas'a mapheo a hae.

Botšepehi ba hae

ke thebe le thejana:

₅U ke ke ua tšaba litšosa tsa bosiu,

kapa metsu e bèbang motšeare,

₆leha e le lefu la seoa,

le khukhunang lefifing,

leha e le koluoa e timetsang

har'a mpa ea motšeare.

₇Batho ba sekete ba ka oa,

ba oa lehlakoreng la hao,

le ba kete tse leshome

ka letsohong la hao le letona;

empa uena

u ke ke ua hlaheloa ke letho.

₈U tla bona ka mahlo a hao

ha ba khopo ba putsoa.

₉Kahobane u entse Morena

setšabelo sa hao,

'me Ea Holimo-limo

u mo entse qhobosheane ea hao,

₁₀ha ho bobe bo ka u oelang holimo,

ha ho kotlo e ka atamelang

motlotloane oa hao.

₁₁O tla laela mangeloi a hae,

a u lebele litseleng tsohle tsa hao.

₁₂A tla u khakeletsa ka liatla tsa 'ona,

esere leoto la hao

la khoptjoa ke lejoe.

₁₃U tla hata tau le marabe,

u hatakele taoana le nōha.

₁₄“Kaha oa nthata, ke tla mo lopolla,”

ho rialo Morena,

“ke mo sireletse,

hobane o tseba lebitso la ka.

₁₅Ha a ipiletsa ho 'na ke tla mo araba;

matšoenyehong ke be le eena,

ke mo lopolle, ke mo tlotlise.

₁₆Ke tla mo sitsa ka litšiu tse telele,

ke 'montše ho pholosa ha ka.”