Puso ea Mesia
1Pesalema ea Solomone.
Oho, Molimo,
etsa hore khosi e ahlole,
e ke e ahlōle ka toka,
u nee mor'a khosi ho loka ha hao,
2a tle a ahlōlele chaba sa hao,
a se ahlolele ka ho loka,
le mafutsana a hao ka toka.
3Lithaba li ke li tlise khotso,
li e tlisetse sechaba,
le 'ona maralla
a se tlisetse ho loka.
4Bahlōphehi har'a sechaba
a ba ahlōlele,
a pholose bana ba mafutsana,
a hatakele mohatelli.
5A ke a phele halelele joaloka letsatsi,
le joaloka khoeli
ho isa melōkong eohle.
6A be joaloka pula e nelang joang,
le joaloka melupe
e noesetsang lefatše.
7Litšiung tsa hae
ho loka ho ke ho ate,
le khotso e be ngata,
ho fihlela khoeli e fifalla ruri.
8A buse ho tloha leoatleng le leng
ho isa ho le leng,
le ho tloha Nōkeng
ho isa pheletsong tsa lefatše.
9Ba mo loantšang
ba ke ba mo khumamele,
lira tsa hae li nyeke lerōle.
10Likhosi tsa Tarashishe
le tsa lihlekehleke
li ke li mo nyehelle,
likhosi tsa Sheba le tsa Seba
li mo tlisetse lithèlo.
11Likhosi tsohle li itihe kapele ho eena,
lichaba tsohle li mo sebeletse.
12O tla lopolla mohloki
ea llang ho eena,
le mohlōphehi
ea hlokang mothusi.
13Ea fokolang le ea hlokang
o tla ba utloela bohlōkō,
a pholose bophelo ba mafutsana.
14O tla ba lopolla,
a ba lopolle ho ba mamènèmènè,
a ba lopolle le ho ba sehlōhō,
mali a bona e tla ba a bohlokoa,
e be a bohlokoa mahlong a hae.
15A ke a phele!
A neoe khauta ea Sheba,
a 'ne a rapelloe ho sa khaotsoe,
a 'ne a bokoe ka matsatsi 'ohle.
16Lefatše le ke le apareloe ke koro,
e ekethèhè qhooeng tsa lithaba,
chai e be joaloka ea Lebanone;
metseng ho tlale batho,
ba be joaloka joang ba naha,
joang bo tlōkōmang.
17Lebitso la hae le se ke la lebaloa,
le se ke la lebaloa le ka mohla,
le hopoloe
ha letsatsi le ntse le chaba.
Lichaba tsohle
li ke li hlohonolofale,
li hlohonolofale ka baka la hae,
merabe eohle
e 'mitse ea lehlohonolo.
18Ho bokoe Morena,
Molimo oa Iseraele,
e leng eena a inotši
ea etsang limakatso.
19Lebitso la hae le tlōtlehang le bokoe,
le bokoe kamehla le mehla,
lefatše lohle le tlale tlōtla ea hae.
A ho be joalo! A ho be joalo!
20Lithapelo tsa Davida, mor'a Jese, li fella mona.
