LIPESALEMA 69

₂Ak'u mpholose Molimo,

hobane metsi aa nkhama.

₃Ke qahiloe tebetebeng ea seretse,

ha ho moo nka hatang teng,

ka hata ka tsitsa.

Ke fihlile koeetseng,

maqhubu a nkoahetse.

₄Ke khathetse ke ho meketsa,

ke se ke chele lentsoe;

mahlo a ka a se a fifetse

ke ho 'na ke lebella Molimo.

₅Ba ntlhoileng ntle ho lebaka

ba bangata,

ba feta qōba tsa moriri oa ka;

lira tsa mahèlèhèlè

li mpheta ka matla,

li ntsekisa seo ke sa se utsoang.

₆Uena Molimo,

u tseba bothoto ba ka,

liphoso tsa ka

ha lia pateha ho uena.

₇Ba u tšepileng

ba se hlajoe ke lihlong,

ka baka la ka,

Morena, Morena oa mabōtho;

ba u batlang

ba se ke ba ferekana,

ka baka la ka,

Molimo oa Iseraele.

₈Ke ka baka la hao

ke jereng sekhobo,

fahleho sa ka

se aparetsoeng ke lihlong.

₉Ke fetohile molichaba

ho bana beso,

ke se ke le ea sa tsejoeng ke bareso.

₁₀Ho chesehella ntlo ea hao ho ntjele,

linyefōlo tsa ba u nyefōlang

le 'na li nkoetse holimo.

₁₁Ha ke itlhōkōfatsa ka ho itima lijo,

hona e ba hoo ke ho nyefōleloang.

₁₂Ha ke apara tse mahoashe,

e-ba ke fetoha pale ho bona.

₁₃Ba lulang khorong tsa motse

ba bua ka 'na,

matahoa a qapile lipina ka 'na.

₁₄Ke lebisa thapelo ea ka

ho uena Morena,

ka nako e u khahlang, Molimo.

Ak'u nkarabe

ka mohau oa hao o moholo,

le ka botšepehi ba hao

bo pholosang.

₁₅Nqaholle tebetebeng ea seretse,

u 'namolele ho ba ntlhoileng,

ke phonyohe koeetseng.

₁₆Ke se ke ka nkoa

ke morallo oa metsi,

ka metsoa ke boliba,

ka kōmetsoa ke lebitla.

₁₇Nkarabe, Morena,

hobane mohau oa hao o moholo,

u ntalime ho ea ka boholo,

boholo ba lerato la hao.

₁₈U se ke ua pata sefahleho sa hao,

ua se patela mohlanka oa hao,

u nkarabe kapele,

hobane ke matšoenyehong.

₁₉Atamela ho 'na, u mpholose,

u ntopolle ka baka la lira tsa ka.

₂₀Uena u tseba sekhobo sa ka,

le lihlong tsa ka,

le ho tlontlolloa ha ka;

ba ntoantšang u ba tseba kaofela.

₂₁Sekhobo se hlabile pelo ea ka,

ke felile;

ke ne ke lebeletse kutloelo-bohlōkō,

empa ha kea ka ka e fumana;

ka batla batšelisi,

ka se ke ka ba fumana.

₂₂Bakeng sa lijo ba 'neile leshokhoa,

ha ke nyoriloe ba 'nea asene.

₂₃Eka lijo tsa bona

li ka ba fetohela leraba,

mekete ea bona ea mahlabelo

ea ba fetohela letlōoa.

₂₄Eka mahlo a bona a ka fifala,

ba se ke ba bona,

matheka a bona

a nonyoloha ho-ea-ho-ile.

₂₅Theolela khalefo ea hao

holim'a bona,

mollo oa bohale ba hao

o ba fumane.

₂₆Leaho la bona le ke le fetohe lesupi,

ho se be motho

metlotloaneng ea bona.

₂₇Ba hlorisa eo u seng u mo shapile,

ba eketsa bohlōkō

ba eo u mo otlileng.

₂₈Ba ekeletse bobe

holim'a bobe ba bona,

ba se ke ba fumanoa ke uena

ba lokile;

₂₉ba hlakoloe bukeng ea bophelo,

ba se ke ba ngoloa le ba lokileng.

₃₀Ha e le 'na ke hlōphehile,

kea opeloa;

oho, Molimo, mpholose,

ke boele ke tsohe.

₃₁Ke tla rorisa lebitso la Molimo

ka sefela,

ke le phafe ka teboho.

₃₂Hona ho tla khahlisa Morena

ho feta hlabelo sa lipohoana,

sa lipohoana tse linaka,

pohoana tse likhōlana.

₃₃Ba eisehang ba tla bona, ba thabe;

lōna, ba batlang Molimo,

betang lipelo.

₃₄Morena o utloa mafutsana,

ha a khese batho ba hae

ba litlamong.

₃₅Maholimo le lefatše

li ke li mo rorise,

le maoatle

le tsohle tse sesang ho 'ona;

₃₆hobane Molimo o tla pholosa Sione,

a tsose metse ea Juda:

hore batho ba tle ba ahe ho eona,

e be lefa la bona.

₃₇Litlōhōlō tsa bahlanka ba hae

li tla e ja lefa,

ba ratang lebitso la hae

ba tla phela ho eona.