LIPESALEMA 66

Etsetsang Molimo litlatse,

lōna ba lefatše lohle,

₂mo rokeng, le tlotlise lebitso la hae,

le mo rorise

ka mokhoa o tlōtlehang.

₃E-reng ho Molimo:

“Mesebetsi ea hao

e tšabeha hakaakang!

Ka baka la matla a hao a maholo,

lira tsa hao lia u qekisa.

₄Lefatše lohle lea u khumamela,

lea u roka,

le roka lebitso la hao.”

₅Tloong, le bohe

mesebetsi ea Molimo:

Oa tšabeha liketsong tsa hae,

ketsong tsa hae ho bana ba batho.

₆O ile a apōla leoatle,

ha hlaha mobu o ommeng,

batho ba tšela nōka ka maoto;

ka baka leo, a re mo thabeleng.

₇Ka matla a hae o busa kamehla,

mahlo a hae a lisa lichaba,

esere bahanyetsi ba boela ba tsoha.

₈Bokang Molimo oa rōna,

lōna lichaba,

utloahatsang thoriso ea hae.

₉Ke eena ea re fileng bophelo,

ea sa kang a tlohela maoto a rōna

a a tlohella ho thella.

₁₀Molimo, u ile ua re hlahloba,

ua re hloekisa sebōping

joaloka silefera;

₁₁ua re tšoasa ka letlōoa,

ua re belesa mojaro o boima;

₁₂ua lumella batho ho re hata melala,

ra feta har'a mollo le metsi;

ua ntan'o re khatholla haholo.

₁₃Ke tla ea tlung ea hao

ke nkile secheso,

ke u phethele likano tsa ka,

₁₄tseo ke li buileng ka molomo oa ka,

ka li bolela ke le matšoenyehong.

₁₅Ke tla u nyehella ka licheso,

ka licheso tsa phoofolo tse nonneng,

le ka secheso sa lipheleu,

secheso se monko o monate,

ke u hlabele lipohoana le liphooko.

₁₆Tloong, le mamele,

lōna bohle ba tšabang Molimo,

ke le phetele

seo a nketselitseng sona.

₁₇Ke ipilelitse ho eena

ka molomo oa ka,

ka mo phafa ka leleme la ka.

₁₈Hoja ke ne ke lumella bobe

pelong ea ka,

Morena a ka be a sa nkutloa,

₁₉empa Molimo o nkutloile,

o mametse sello sa thapelo ea ka.

₂₀Ho bokoe Molimo,

ea sa kang a lahla thapelo ea ka,

ea sa kang a ntima mohau oa hae.