Tšireletso malemeng a ba khopo
1Pesalema ea Davida, e qapetsoeng motsamaisi oa libini.
2Molimo, ak'u utloe sello sa ka,
sello sa ka sa masisa-pelo,
u sireletse bophelo ba ka,
u bo seriletse ha sera se ntšosa.
3Mpate hōle le mokhatlo,
mokhatlo oa ba etsang bobe,
hōle le sehlopha sa ba khopo;
4ba leotsang maleme a bona
ba a leotsa sa lisabole,
ba hlabang ka mantsoe a babang,
mantsoe a kang metsu.
5Ba fula ea se nang koli ba ipatile,
ba mo fula ka tsometso
ba se na letsoalo.
6Ba tiile morerong oa bona o mobe,
ba rera ho cheha maraba, ba re:
“Re tla bonoa ke mang?”
7Ba rera bokhopo, ba re:
“Re lohile mano ka bohlale.”
Mehopolo ea motho ke koeetsa,
le pelo ea hae ke koeetsa.
8Empa Molimo o ba fula
ka metsu ea hae,
o ba hlaba ka ho ba tsometsa.
9Maleme a bona aa ba timetsa;
bohle ba ba bonang
ba sisinya lihlooho.
10Joale bohle ba tla tšaba,
ba bolele mosebetsi oa Molimo,
ba utloisise ketso ea hae.
11Ea lokileng o tla thabela Morena,
'me a tšabele ho eena;
bohle ba pelo li ntle ba ithorise.
