LIPESALEMA 22

₂Molimo oa ka, Molimo oa ka,

u ntahletse'ng?

U hōle le ho mpholosa,

ha u utloe ho lumaela ha ka.

₃Molimo oa ka,

ke ipiletsa le motšeare,

empa ha u nkarabe;

ke hōoa le bosiu, ha ke khutse.

₄Athe uena ua halalela,

uena eo Iseraele

a u binelang lithoko.

₅Bo-ntat'a rōna ba 'nile ba u tšepa;

ba u tšepa, 'me ua ba namolela.

₆Ba 'nile ba u llela,

'me ba phonyoha;

ba u tšepa,

'me ha baa ka ba hlajoa ke lihlong.

₇Empa 'na ke sebōkō, ha ke motho;

ke sekhobo ho bohle,

ke nyelisoa ke sechaba.

₈Bohle ba mponang baa ntšoma,

ba 'nyekoletsa melomo,

ba ntšisinyetsa lihlooho, ba re:

₉“O tšepile Morena!

A ke a mo lopolle,

a mo pholose haeba a mo rata!”

₁₀Athe ke uena

ea 'ntšitseng pōpelong ea 'mè,

ua etsa hore 'mè

a ntšike sefubeng sa hae;

₁₁ke abetsoe uena

ho tloha tsoalong ea ka,

u bile Molimo oa ka

ke sa le pōpelong ea 'mè.

₁₂Se be hōle le 'na,

hobane matšoenyeho a haufi,

'me ha ho ea ka nthusang.

₁₃Lipohoana tse ngata li ntikile,

lipoho tsa litonana tsa Bashane

li mpokanetse;

₁₄lira li mpetletse meno,

joaloka tau tse purumang,

tse harōlang.

₁₅Ke joaloka metsi a tšolohang,

masapo a ka a tsoenehile;

pelo ea ka e joaloka tšōtso,

e qhibiliha ka sefubeng sa ka;

₁₆'metso oa ka

o omeletse joaloka lengetana,

leleme la ka

le khomaretse mahalapeng a ka.

U nthobalitse lerōleng la lefu.

₁₇Lintja tse ngata li ntikile,

sehlopha sa linokoane

se ntikanetse,

tsena li ntlepotse maoto le matsoho.

₁₈Nka bala masapo a ka kaofela.

Batho ba nchebile, ba 'makaletse;

₁₉ba arolelana liaparo tsa ka,

ba laola aparo sa ka ka lōtho.

₂₀Empa uena Morena,

u se be hōle le 'na;

uena, matla a ka,

potlakela ho nthusa.

₂₁Pholosa bophelo ba ka saboleng;

ke bona feela,

bo pholose marōng a ntja.

₂₂Mpholose litleneng tsa tau;

'na ea fokolang

mpholose nakeng tsa linare.

₂₃Ke tla tumisa lebitso la hao

har'a bana beso,

ke u rorise har'a phutheho, ke re:

₂₄“Lōna ba hlomphang Morena,

mo roriseng;

lōna litlōhōlō tsohle tsa Jakobo,

mo tlotliseng;

lōna litlōhōlō tsohle tsa Iseraele,

mo tšabeng.

₂₅“Ha aa ka a nyelisa ea hlōphehileng,

leha e le ho se tsotelle

bohlōphehi ba hae;

ha aa ka a mo patela fahleho sa hae,

empa o ile a utloa ha a mo llela.”

₂₆Ke tla u rorisa phuthehong e kholo,

kapele ho ba u hlomphang,

ke phethe likano tsa ka.

₂₇Ba eisehang ba tla ja, ba khore,

ba batlang Morena ba tla mo rorisa;

pelo tsa bona

li ke li thabe kamehla.

₂₈Lefatše ka bophara ba lona

le hopole Morena,

le ke le khutlele ho eena;

merabe eohle ea lefatše e itihele,

e ke e itihele maotong a hae;

₂₉hobane puso ke ea Morena,

'me o rena holim'a lichaba.

₃₀Bohle ba nang le matla lefatšeng

ba tla itihela maotong a hae;

bohle ba fellang lerōleng

ba tla mo khumamela.

'Na ke tla phelela eena;

₃₁litlōhōlō tsa ka li tla mo sebeletsa.

Melōko e tlang

e tla tsebisoa Morena,

₃₂sechaba se e-s'ong ho tsoaloe

se tla senoleloa ho loka ha hae:

Ona ke mosebetsi oa Morena.