LIPESALEMA 21

₂Khosi e thabela

matla a hao Morena,

e nyakallela

thuso ea hao hakaakang!

₃U e neile se ratoang

ke pelo ea eona,

ha ua ka ua e hanela kōpo

e tsoang molomong oa eona.

₄U khahlanyelitse khosi

ka mahlohonolo,

ua e roesa mofapahlooho

oa khauta e hloekisitsoeng.

₅E kōpile bophelo ho uena,

'me u e file bona,

ua e ekeletsa litšiu,

kamehla le mehla.

₆Tlōtla ea eona e kholo

ka thuso ea hao,

u e apesitse khanya le hlompho.

₇U e neile mahlohonolo ho isa khale,

ua e thabisa haholo

ka boteng ba hao.

₈Khosi e tšepile Morena,

ka baka la mohau

oa Ea Holimo-limo,

e ke ke ea sisinngoa.

₉Letsoho la hao, khosi,

le tla fihlela lira tsohle tsa hao,

letsoho la hao le letona

le tla fihlela bohle,

bohle ba u hloileng;

₁₀hang ha u hlaha, u tla ba felisa;

u ba felise

eka ba ka sebōping sa mollo.

Morena o tla ba metsa ha a halefile,

mollo o ba chese.

₁₁U tla hlakola

bana ba bona lefatšeng,

le litlōhōlō tsa bona

har'a bana ba batho.

₁₂Ha ba rera ho u etsetsa bobe,

ha ba lōha mano,

ba ke ke ba atleha;

₁₃u tla etsa hore ba u supe ka lirethe,

u hule seqha sa hao ho ba fula.

₁₄Thusa, Morena, ka matla a hao!

Re tla bina, re roke bonatla ba hao.