LIPESALEMA 19

₂Maholimo a phatlalatsa

tlōtla ea Morena,

sebaka sa leholimo sea bolela,

se bolela mosebetsi oa liatla tsa hae;

₃letsatsi ka leng le phetela le leng,

bosiu ka bong bo tsebisa bo bong,

₄ho se puo, ho se polelo,

ho se mantsoe a utloahalang.

₅Empa molumo oa tsona

o anetse lefatše lohle,

polelo tsa tsona li finyeletse,

li finyeletse pheletsong tsa lefatše.

Maholimong, Molimo

o hlometse letsatsi tente,

₆'me lona le ka monyali

a e-tsoa leqatheng,

joaloka mohale,

le thabela ho qeta tsela ea lona.

₇Le chaba ntlheng e 'ngoe

ea maholimo,

le potoloha ho fella ntlheng e 'ngoe;

ha ho letho

le ka balehang mofuthu oa lona.

₈Molao oa Morena o phethehile,

ke 'musa-pelo;

temoso tsa Morena lia tšepahala,

li hlalefisa sethoto.

₉Melao ea Morena e lokile,

e hlatsoa pelo;

taelo ea Morena e hlakile,

e elisa mahlo.

₁₀Ho tšaba Morena

ke ntho e molemo,

e ke keng ea fetoha ho isa khale;

likahlōlo tsa Morena ke tsa 'nete,

kaofela ha tsona li lokile.

₁₁Li khahleha ho feta khauta,

ho feta le khauta

e hloekisitsoeng haholo;

li monate ho feta mahe a linotši,

mahe a rothang khekheng ea tsona.

₁₂Li ruta mohlanka oa hao,

ea li bōlōkang

o fumana moputso o moholo.

₁₃Empa ke mang

ea ka elelloang liphoso tsa hae?

Ak'u ntokolle

ho tseo ke sa li tsebeng.

₁₄Phemisa mohlanka oa hao,

u mo phemise boikhantšo,

u se ke ua lumella hore bo mpuse.

Kahoo ke tla hloka koli,

ke hloke molato oa sebe se seholo.

₁₅Ak'u khahloe ke mantsoe

a tsoang molomong oa ka,

le ke menahano e ka pelong ea ka,

uena Morena, lefika la ka,

le molopolli oa ka.