LIPESALEMA 18

Kea u rata Morena,

uena matla a ka.

₃Morena ke lehaha la ka,

ke qhobosheane ea ka,

ke monamoleli oa ka.

Molimo oa ka ke lefika la ka,

leo ke tšabelang ho lona;

Morena ke thèbè ea ka,

ke lenaka la ka le ntoanelang,

ke seqhobo sa ka.

₄Ke ipilelitse ho Morena

ea lokelang ho rorisoa,

'me ka pholosoa lireng tsa ka.

₅Maqhubu a lefu a ne a ntikile,

phororo tsa timelo li ne li nkukile.

₆Maraba a lefu a ne a mpota-potile,

lifi tsa lefu li ne li nchehile.

₇Makaqabetsing a ka

ka ipiletsa ho Morena,

ka llela Molimo oa ka

hore a nthuse;

a utloa lentsoe la ka

a le ka tempeleng ea hae,

sello sa ka sa fihla tsebeng tsa hae.

₈Lefatše la reketla, la thōthōmela,

methèo ea lithaba ea tsukutleha,

ea reketla, hobane a halefile.

₉Mosi oa fōqōha ka nkong tsa hae,

mollo o timetsang

oa betseha ka hanong la hae,

mashala a hlenneng

a tsoa ka ho lona.

₁₀A phetla maholimo,

a theohela fatše,

leru le letšo le le maotong a hae;

₁₁a fofa a palame kerubime,

a hōballa a le mapheong a moea.

₁₂Lefifi a le etsa lesira la hae,

maru a matšo a lusang pula,

'ona a a etsa tente ea hae;

₁₃maru a apoloa ke khanya

e mo etellang pele,

ha na sefako sa mashala a tukang.

₁₄Morena a thoathoaretsa

a thoathoaretsa a le maholimong,

Ea Holimo-limo

a utloahatsa lentsoe la hae;

₁₅a fula ka metsu ea hae,

lira tsa qhalana,

a betsa mahalima,

'me tsa phasa-phasa.

₁₆Maliba a maoatle

a bonahala tlase-tlase,

methèo ea lefatše ea phetleha,

ha ho omana uena Morena,

ha ho fōka moea

o tsoang ka nkong tsa hao.

₁₇Morena a 'nanabela a le holimo,

a 'nanabela a ntšoara,

a nkinola metsing a leoatle;

₁₈a 'namolela sereng sa ka se matla,

ho ba ntlhoileng,

ba neng ba mphekisa.

₁₉Ba mphutuhela mohl'a tlokotsi ea ka,

empa Morena a nthusetsa;

₂₀a ntokolla, a mpholosa,

a mpholosa hobane a nthata.

₂₁Morena o mputsitse

ho ea ka ho loka ha ka,

o mpuselelitse

ho ea ka ho hloka molato ha ka.

₂₂Ke tiiselitse tseleng ea Morena,

ha kea etsa bokhopo,

ka arohana le Molimo oa ka.

₂₃Ke falimehetse

kahlōlo tsa hae tsohle,

ha kea qhelela taelo tsa hae kathōko.

₂₄Mahlong a hae ha ke na koli,

ke ipōlōkile ke se na molato.

₂₅Morena o mputsitse

ho ea ka ho loka ha ka,

hobane oa bona hore ke hloekile.

₂₆Ho ea tšepahalang, ua tšepahala;

ho ea se nang koli, u hloka koli.

₂₇Ho ea hloekileng, u hloekile;

empa ho molotsana, u masene.

₂₈Ke uena ea pholosang

sechaba se hlōphehileng,

empa u kokobetsa baikhōhōmōsi.

₂₉Morena, ke uena lebone la ka,

Molimo oa ka o bonesa lefifi la ka.

₃₀Ka thuso ea hao

nka thula lira tsa ka,

ka thuso ea Molimo oa ka

nka tlōla lerako.

₃₁Tsela tsa Molimo li phethehile,

tšepiso tsa Morena ke tsa 'nete;

eena ke thebe

ea bohle ba tšabelang ho eena.

₃₂Molimo ke mang,

haese Morena?

Lefika ke mang,

haese Molimo oa rōna?

₃₃Ke eena Molimo ea 'matlafatsang,

ea ntsamaisang tseleng e ntle;

₃₄ea potlakisang maoto a ka

joaloka a likhama,

ea mpeang holim'a lihlaba;

₃₅eena ea nthutang ho loana,

eena ea nthutang

ho hula seqha sa lethose.

₃₆U 'nea thèbè ea hao e pholosang,

letsoho la hao le letona

lea ntšehetsa,

paballo ea hao ea nkhōlisa.

₃₇U ntlhekela tsela e batsi,

maoto a ka ha a thelle.

₃₈Ke lelekisa lira tsa ka,

ke be ke li tšoare;

ha ke khutle ke e-s'o li timetse.

₃₉Kea li hlathaka, li sitoa ho tsoha,

li oela tlas'a maoto a ka.

₄₀U 'matlafaletsa ntoa,

ba ntoantšang u ba bea tlas'a ka.

₄₁U etsa hore lira tsa ka

li ntšupe ka lirethe,

ba ntlhoileng kea ba timetsa.

₄₂Ba llela thuso, ba hloka mopholosi;

ba llela Morena, ha a ba arabe.

₄₃Ke ba thumisa joaloka lerōle,

lerōle le fefoloang ke moea,

ke ba hatakela

joaloka seretse se tseleng.

₄₄U 'namolela

meferefereng ea sechaba,

u nketsa 'musi oa lichaba;

lichaba lia ntšebeletsa, tsebe

lichaba tseo ke neng ke sa li tsebe.

₄₅Hang ha li nkutloa

lia 'mamela,

li ipea tlas'a puso ea ka

ha li mpona.

₄₆Lichaba li khathala matla,

li tsoa li thōthōmela

qhobosheaneng tsa tsona.

₄₇Molimo oa phela!

Ho bokoe Lefika la ka!

Molimo, mopholosi oa ka,

a ke a thoholetsoe!

₄₈Molimo ea ntšitsang

ka liphetetso,

ea beang lichaba tlas'a ka.

₄₉U 'namolela lireng tsa ka,

u mphahamisetsa kaholimo,

kaholimo ho ba ntoantšang,

u 'namolela liatleng tsa ea sehlōhō.

₅₀Ka baka leo,

ke tla u boka har'a lichaba,

ke roke lebitso la hao Morena,

₅₁uena ea neang khosi ea hao,

ea e neang tlhōlo e kholo,

ea bontšang mohau

ho motlotsuoa oa hao,

ho Davida le litlōhōlō tsa hae

kamehla le mehla.