Lehlohonolo la motho ea tšabang Morena
1Haleluja!
Ho lehlohonolo
ea tšabang Morena,
ea thabelang melao ea hae haholo.
2Litlōhōlō tsa hae
li tla ba matla lefatšeng,
molōko oa ba pelo li ntle
o tla hlohonolofala.
3Menono le maruo li ka tlung ea hae,
ho loka ha hae
ho hlola kamehla eohle.
4Ho ba pelo li ntle
o ka leseli le chabang lefifing;
o mosa, o na le kutloelo-bohlōkō,
hape o lokile.
5Ho lehlohonolo motho ea mosa,
motho ea alimanang,
ea sebetsang litaba tsa hae ka toka.
6A ke ke a sisinngoa le ka mohla,
ea lokileng o tla 'ne a hopoloe,
a hopoloe kamehla eohle.
7A ke ke a tšosoa
ke ho utloa taba tse bohlōkō,
pelo ea hae e matlafetse,
o tšepile Morena;
8pelo ea hae e tiile, ha a tšabe letho,
o tella ba mo loantšang.
9O fana ka matsoho a mabeli,
o fana ho mafutsana,
ho loka ha hae
ho hlola kamehla eohle,
o tsoha molota, oa tlōtleha.
10Ea khopo ha a bona hoo,
oa tlallana,
o tsikitlanya meno, oa monyela;
takatso ea ea khopo e tla fela.
