LIPESALEMA 107

₁Bokang Morena, hobane o molemo;

mohau oa hae

ke oa kamehla eohle.

₂Ba ke ba rialo

bao Morena a ba lopolotseng,

a ba namolela

matsohong a mohatelli;

₃a ba phutha, a ba ntša linaheng

tsa bochabela le bophirimela,

tsa boroa le leboea.

₄Ba ne ba phaila lefeelleng,

ba phaila lehoatateng,

ba sa fumane tsela e eang motseng

oo ba ka ahang ho oona,

₅ba lapile, ba nyoriloe,

ba le lekhatheng la ho ilibana.

₆Matšoenyehong a bona

ba ipiletsa ho Morena,

'me a ba lopolla tsietsing ea bona.

₇A ba tsamaisa tseleng e otlolohileng,

a ba isa motseng

oo ba ka ahang ho oona.

₈Ba ke ba boke Morena

ka baka la mohau oa hae,

le limakatso tsa hae

ho bana ba batho.

₉O ile a tima lenyora

la ba nyoriloeng,

a khōrisa ba lapileng

ka tse molemo.

₁₀Ba bang ba ne ba phela

lefifing le letšo-letšo,

ba tlamiloe ke litlhōpheho

le ke 'ona mahlaahlela,

₁₁hoba ba fetohetse taelo tsa Molimo,

ba khesitse keletso

ea Ea Holimo-limo.

₁₂A ba kokobetsa

ka mesebetsi e boima,

ba khōthōmetseha,

ho se ea ka ba thusang.

₁₃Matšoenyehong a bona

ba lla ho Morena,

'me a ba pholosa tsietsing ea bona.

₁₄A ba ntša lefifing, le bolutung,

a khaola litlamo tsa bona.

₁₅Ba ke ba boke Morena

ka baka la mohau oa hae,

le limakatso tsa hae

ho bana ba batho.

₁₆O ile a pshatla mamati a koporo,

a robaka mekoallo ea tšepe.

₁₇Ba bang ba thotofatsoa

ke metsamao ea bona e khopo,

ba hlōkōfatsoa

ka baka la melato ea bona,

₁₈ba tenoa ke lijo tsohle;

ba ne ba se ba le lintšing tsa lefu.

₁₉Matšoenyehong a bona

ba lla ho Morena,

'me a ba pholosa tsietsing ea bona.

₂₀A laela, 'me ba fola,

a ba phemisa lebitla.

₂₁Ba ke ba boke Morena

ka baka la mohau oa hae,

le limakatso tsa hae

ho bana ba batho.

₂₂Ba nyehele ka mahlabelo a teboho,

ba tumise mesebetsi ea hae,

ba e tumise ka mehoo ea thabo.

₂₃Ba bang ba tsamaea

leoatleng ka likepe,

ba hoèba ka ho haola maoatle.

₂₄Le bona ba bone

mesebetsi ea Morena,

le limakatso tsa hae malibeng.

₂₅A laela, ha tsoha sefefo,

sa phahamisa maqhubu a leoatle;

₂₆ba betsetsoa holimo-limo,

ba theoleloa tlase-tlase,

ba nyekeloa ke lipelo.

₂₇Ba tšoaroa ke molikoalikoane,

ba thekesela joaloka matahoa,

ba timelloa ke bohlale bohle.

₂₈Matšoenyehong a bona

ba lla ho Morena,

'me a ba ntša tsietsing ea bona.

₂₉A khutsisa sefefo,

'me maqhubu a khaotsa ho befa.

₃₀Ba thaba hobane ho khutsitse;

a ba sesisetsa koung

eo ba neng ba leba ho eona.

₃₁Ba ke ba boke Morena

ka baka la mohau oa hae,

le limakatso tsa hae

ho bana ba batho.

₃₂Ba mo tlotlise

phuthehong ea sechaba,

ba mo rorise

mokhatlong oa ba baholo.

₃₃O ne a fetole linōka lehoatata,

le liliba

a li fetola baka tse omeletseng.

₃₄Mobu o nonneng

a o fetola lenyèkèthè,

ka baka la bokhopo

ba baahi ba teng.

₃₅Lehoatata a le fetola letša la metsi,

naha e tšehla a e fetola liliba.

₃₆Ba lapileng a ba ahisa ho eona,

ba thea motse oo

ba ka ahang ho oona.

₃₇Ba jala masimong,

ba lema morara,

kotulo ea e-ba kholo.

₃₈A ba hlohonolofatsa,

ba ngatafala haholo,

a ba atisetsa leruo la liphoofolo.

₃₉Empa joale ba qepha,

ba kokobetsoa,

ka baka la ho imeloa

ke litsietsi le mahlomola.

₄₀A theolela nyeliso ho mahosana,

a a sōllisa lehoatateng

moo ho seng tsela.

₄₁Empa a ntša mafutsana

bohlōphehing ba 'ona,

a atisa malapa a 'ona

joaloka mohlape.

₄₂Ba pelo li ntle ba bona hoo,

'me ba thaba,

empa ba khopo bona

ba thijoa melomo.

₄₃Mang le mang ea bohlale

a ke a ele tsena hloko,

a ke a utloisise ketso tsa mohau

mohau oa Morena.