LIPESALEMA 105

₁Bokang Morena,

le rapele lebitso la hae,

le tumise liketso tsa hae,

le li tumise har'a lichaba.

₂'Mineleng, le mo roke,

le nahane limakatso tsa hae tsohle.

₃Ithoriseng ka lebitso la hae,

lebitso la hae le halalelang,

pelo tsa ba batlang Morena

li ke li thabe.

₄Batlang Morena le matla a hae;

le 'ne le batle sefahleho sa hae,

le se batle kamehla le mehla.

₅Hopolang limakatso tsa hae

tseo a li entseng,

mehlolo ea hae,

le likahlōlo tseo a li boletseng,

₆lōna ba lelōko la Aborahama,

mohlanka oa hae,

lōna bana ba Jakobo,

bao a ikhethetseng bona.

₇Morena ke eena Molimo oa rōna,

ke eena ea ahlōlang lefatše lohle.

₈Ha a lebale selekane sa hae

le ka mohla,

tšepiso eo a e entseng,

a e etsetsa melōko e sekete;

₉selekane seo a se entseng

a se etsa le Aborahama,

le kano eo a e entseng,

a e etsetsa Isaka,

₁₀hore e be molao o tiileng ho Jakobo,

le lekane sa kamehla eohle

ho Iseraele,

₁₁ha a re:

“Ke tla u nea naha ea Kanana,

e le lefa leo ke u abelang lona.”

₁₂Ha ba ne ba sa le 'maloana,

e le bajaki ba seng bakae naheng eo,

₁₃ba ntse ba lelera har'a lichaba,

ba tloha 'musong o mong,

ba e-ea ho o mong,

₁₄Molimo ha aa ka a lumela,

a lumella motho hore a ba tube,

'me ka baka la bona

a khalema likhosi, a re:

₁₅“Le se ke la ama

batlotsuoa ba ka,

le se la etsa

baporofeta ba ka hampe.”

₁₆Joale a lihela tlala lefatšeng,

lijo tsohle tse ba phelisang

a li felisa;

₁₇eaba o rōmela monna e le selelekela:

Josefa a rekisoa ho ba lekhoba.

₁₈Ba mo hlōkōfatsa

ka ho mo tlama maoto ka litšepe,

ba 'mofa ka mahlaahlela,

₁₉ho fihlela se etsahala,

seo a se boletseng e sa le pele,

'me a pakoa

ke lentsoe la Molimo.

₂₀Khosi ea laela hore a tlamolloe,

'musi oa lichaba a mo lokolla.

₂₁Ea mo etsa mookameli

oa lelapa la eona,

le 'musi oa tsohle

tseo e li ruileng,

₂₂a tle a rute mahosana

ho ea ka thato ea hae,

a hlalefise baholo

ba sechaba sa eona.

₂₃Eaba Iseraele o fallela Egepeta,

Jakobo a jaka naheng ea Kama.

₂₄Molimo a ngatafatsa sechaba sa hae,

a se ngatafatsa haholo,

a se matlafatsa ho feta lira tsa sona.

₂₅A fetola pelo tsa tsona,

tsa hloea chaba sa hae,

tsa sebetsa bahlanka ba hae

ka bolotsana.

₂₆A rōmela Moshe, mohlanka oa hae,

le Arone eo a mo khethileng.

₂₇A etsa lipontšo tsa hae ka bona,

le limakatso tsa hae

naheng ea Kama.

₂₈A rōmela lefifi, 'me ha fifala;

empa Baegepeta ba hanyetsa,

ba hanyetsa polelo tsa hae.

₂₉Metsi a naha ea bona

a a fetola mali,

a bolaea le litlhapi tse ho 'ona.

₃₀Naha ea bona

ea nyeunya lihohoana,

esita le ka matlung

a likhosi tsa bona.

₃₁A laela, ha hlaha libōba,

le menoang, naheng eohle ea bona.

₃₂Bakeng sa pula a ba nesetsa sefako,

mollo oa lehalima

oa oela naha ea bona.

₃₃A senya morara oa bona le feiee,

a roba lifate tsa naha ea bona.

₃₄A laela, ha hlaha litsie,

le bookholane bo se nang palo.

₃₅Tsa kumōla joang bohle

ba naha ea bona,

tsa kōkōna tsohle

tse behoang ke naha.

₃₆A bolaea matsibolo 'ohle

a naha ea bona,

bana ba bona ba matsoathaka.

₃₇A ntša Baiseraele ba kakatetse,

ba kakatetse silefera le khauta,

ho se ea tsiapaneng

har'a melōko ea bona.

₃₈Egepeta ea thabela ho falla ha bona,

hobane e ne e tšohile haholo.

₃₉A phuphuthisa leru, la ba koahela;

mollo oa ba bonesetsa bosiu.

₄₀Ba kōpa,

eaba o ba tlisetsa likoekoe;

a ba khōrisa ka bohobe

bo tsoang maholimong.

₄₁A petsola lefika, metsi a phorosela;

a phalla libataolong eka ke nōka.

₄₂Ke hobane o ne a hopotse tšepiso,

tšepiso ea hae e halalelang,

ho Aborahama, mohlanka oa hae.

₄₃A ntša sechaba sa hae ka nyakallo,

bakhethoa ba hae

ka litlatse tsa thabo.

₄₄Eaba o ba nea naha tsa balichaba,

ba ja lefa la mofufutso

oa merabe eo,

₄₅hore ba tle ba bōlōke litaelo,

ba bōlōke taelo tsa hae,

ba hlomphe melao ea hae.

Haleluja!