MAELE 7

₁Mora oa ka,

boloka polelo tsa ka,

u boloke taelo tsa ka,

li boloke ka pelong ea hao.

₂Boloka taelo tsa ka u tle u phele,

thuto tsa ka le tsona li hlokomele,

li hlokomele

seka thaka ea ihlo la hao.

₃Li tlamelle menoaneng ea hao,

u li ngole tlapeng la pelo ea hao.

₄E-re ho bohlale: “Uena khaitseli,”

kutloisiso eona

e bitse motsoalle oa hao.

₅Li tla u phemisa mosali,

mosali oa sehlola,

mosali ea èkang ka lipolelo.

₆Fesetereng ea ntlo ea ka

ka talima ka mamatjana a eona.

₇Ka talima har'a ba se nang tsebo,

ka bona mohlankana

ea hlokang kutloisiso,

₈a feta pel'a huku ea seterata,

a tsamaea ka tsela e eang ha sehlola;

₉e le ka shoalane,

tsatsi le se le liketse,

fifi la bosiu le qala ho aparela.

₁₀Mosali a betseha

ho mo khahlanyetsa,

a apere joaloka seotsoa,

ka maqheka a sona.

₁₁O manganga, ke 'maliberoane,

ke pheha-ka-leoto, ha a lule hae;

₁₂ere a le seterateng,

a b'a s'a le mabaleng,

a qachama joalo

hukung tsa literata.

₁₃A mararela mohlankana enoa,

a mo aka,

ka fahleho se hlokang tlhong

a re ho eena:

₁₄“Kajeno ke entse nyehelo ea ka,

kano tsa ka kajeno ke li phethile,

ke na le lijo tsa nyehelo eo,

ke na le tsona ha ka;

₁₅ke tlile tjena ho u khahlanyetsa,

khale ke u batla, joale ke u fumane!

₁₆Holim'a moalo oa ka

ke alile masela a lene,

lene e mebala-bala e tsoang Egepeta.

₁₇Ke nonolitse moalo oa ka ka 'mira,

ka o nonotsa ka lekhala le sinamone.

₁₈Tloo, re khotsofatse rato la rōna

ho fihlela bo e-sa,

re ithabise ka ho mamarelana.

₁₉Hae mona monna oa ka ha a eo,

o nkile leeto, o ile hōle.

₂₀O nkile mokotlana o tletse chelete,

o tla khutlela hae khoeli e tolokile.”

₂₁Ka puo tsa lehèlèhèlè lena

mohlankana a ineela,

ka molomo oa lona o èkang,

mohlankana a hapeha.

₂₂Ka ho panya ha ntši

mohlankana a le sala morao,

a le latela sa pholo e isoa tlhabong,

sa khama e tlōlela ka lemeneng;

₂₃sa nonyana e tšoasoa

ke raba le chehiloe,

e sa tsebe hore joale e ea lefung,

ho fihlela ha motsu

o e phunya sebete.

₂₄Joale bana ba ka 'mameleng,

sekehelang polelo tsa ka tsebe.

₂₅Pelo tsa lōna

li se latele mekhoa ea seotsoa,

le se tsamaee mehlaleng ea sona.

₂₆Mahlatsipa a mangata

se a entse mofela,

tšoele la ba bolailoeng ke sona

ha le na palo.

₂₇Ntlo ea sona

ke tsela e isang lebitleng,

ke 'mila o isang Qalong ea Bafu.