MAELE 5

₁Mora oa ka,

ela bohlale ba ka hloko,

thuto ea ka u e sekehele tsebe,

₂u tle u be le tlhalohanyo,

molomo oa hao o rue tsebo.

₃Molomo oa mosali oa sehlola

o qhitsa linotši,

leme la hae

le borethe ho feta leokoana;

₄qetellong le baba sa leshokhoa,

le bohale sa sabole,

sabole e mahale-mabeli.

₅Maoto a hae a theohela lefung,

mehato ea hae e lebisa lebitleng;

₆tsela ea bophelo

ha a re letho ka eona,

metsamao ea hae

e khopametse moo a sa tsebeng.

₇Kahoo bana ba ka,

'mameleng ke hona:

Polelo tsa ka

le se ke la li kheloha;

₈le tsamaeeng tseleng tse hōle,

tse hōle le sehlola,

monyako oa ntlo ea sona

le se o atamele,

₉esere matla a lōna

a itjelloa ke ba bang,

lilemo tsa lōna

tsa fella ho ea sehlōhō,

₁₀ba bang ba ithabisa

ka maruo a lōna,

mofufutso oa lōna

oa ruisa lapa lesele.

₁₁Qetello ea bophelo ba hao

e tla ba mefehelo,

ha 'mele oa hao o motetse,

u s'u le masatsoane.

₁₂U tla re:

“Ke ne ke hloile ho khalengoa,

ho ntšoa liphoso

le hona ke ho hloile!

₁₃thuto tsa baruti ba ka

ke ne ke sa li natse,

balai ba ka le bona

ke sa ba mamele.

₁₄Joale ke fihlile lintšing tsa timelo,

ke eme kahar'a phutheho eohle.”

₁₅Joale noa metsi

a liba sa ho chekoa ke uena,

metsi a phallang a mohloli oa hao.

₁₆U re bonna ba hao

bo tšolohele litseleng,

matla a bona a hafakoe mabaleng?

₁₇Eka khona e be ba hao u le inotši,

u se k'a bo abelana le ba bang.

₁₈Bonna ba hao

bo ke bo hlohonolofale,

u ithabise

ka mosali oa hao oa matsoathaka,

₁₉ea ratehang sa tšèpè,

ea natlailang sa khama;

kamehla matsoele a hae

a u thabise,

kamehla rato la hae

le ke le u hohele.

₂₀Mora oa ka,

ho ea ka'ng

ha sehlola se u hohela?

U manamela'ng

fubeng sa mosali oa motho?

₂₁Tsela tsohle tsa motho

Morena oa li bona,

metsamao eohle ea hae

le eona oa e lekola.

₂₂Motho ea khopo

o tšoasoa ke makhopo a hae,

likhoele tsa libe tsa hae

li mo khatele ruri.

₂₃O tla bolaoa ke ho hloka khalemo,

tsela a e khelosoe

ke bothotohali ba hae.