MAELE 4

₁Bana, mamelang thuto,

thuto ea ntat'a lona,

le e ele hloko,

e tl'e le ruise kutloisiso.

₂Ke le nea thuto ea sebele,

se e furalleng ke hona.

₃Ha ke ne ke le ngoana

ea ratoang ke ntat'ae,

ngoana ea mong feela,

sebokotsoa-ke-'m'ae,

₄ntate a n'a nthuta, a re:

“Polelo tsa ka

li se tlohe pelong ea hao,

boloka taelo tsa ka u tle u phele.

₅Iphumanele bohlale,

iphumanele kutloisiso,

se lebale polelo tsa ka,

u se li khelohe;

₆se furalle bohlale, bo tla u sireletsa;

bo rate, bo tle bo u lebele.

₇Bo kaholimo ho tsohle,

iphumanele bona,

ka tsohle tseo u nang le tsona,

u bo reke, u iphumanele kutloisiso.

₈Bo thōhōletse, bo tla u phahamisa;

ha u bo khomarela bo tla u tlōtla.

₉Bo tla khabisa hlooho ea hao,

bo e khabise

ka moqhaka o bohehang,

bo u roese mofapahlooho oa tlōtla.”

₁₀Mora oa ka, mamela,

u amohele polelo tsa ka,

lemo tsa bophelo ba hao li tle li ate.

₁₁Ke u rutile tsela tsa bohlale,

ka u tsamaisa tseleng tse otlolohileng.

₁₂Ha u tsamaea

u ke ke ua sitisoa ke letho,

ha u matha u ke ke ua khoptjoa.

₁₃Tšoara thuto ena, u e mamarele,

u e lise ka thata,

ke eona bophelo ba hao.

₁₄Se tsamaee tseleng tsa ba khopo,

se tsamaee tseleng ea baetsalibe.

₁₅E khese, u be u e koekoetle;

e khelohe, u ikele ka tsela ea hao.

₁₆Ha ba sa etse bokhopo

ha ba robale,

ba falimehisoa

ke takatso ea ho bolaea.

₁₇Ba ja bohobe ba bokhopo,

ba noe veine ea meferefere.

₁₈Tsela ea ba lokileng

e ka mafube a meso,

khanya ea eona e eketseha,

ho fihlela har'a mp'a motšeare.

₁₉Tsela ea ba khopo e ka fifi le letšo,

ha ba tsebe se ba khōthōmetsang.

₂₀Mora oa ka,

mamela mantsoe ana a ka,

u sekehele polelo tsa ka tsebe.

₂₁Polelo tsa ka u se li lebale,

u li boloke ka pelong ea hao;

₂₂ke bophelo ho ba li amohelang,

li phelisa 'mele ea bona hamonate.

₂₃Baballa pelo ea hao,

e baballe ho feta tsohle,

hobane ke eona liba sa bophelo.

₂₄Se bue leshano ka molomo oa hao,

puo tse thetsang

li se tsoe ka hanong la hao.

₂₅Mahlo a hao

a talime kapele ho uena,

lintši tsa hao li se ke tsa panya.

₂₆Qamaka ka hloko

moo o hatang teng,

tsela tsohle tsa hao li tle li tsitse.

₂₇Se khelohele ka ho le letona

kapa ka ho le letšehali,

mehato ea hao

e u phemise bokhopo.