1Pelo ea khosi
e ka atleng tsa Morena,
o e isa moo a ratang
sa metsi a molatsoana.
2Motho o bona tsela tsohle tsa hae
o li bona li nepahetse,
empa Morena ke eena
ea lekolang pelo.
3Ho etsa ho lokileng
le ho phetha toka
ho amoheleha ho Morena
ho feta sehlabelo.
4Fahleho se hoapileng
le pelo e ikhōhōmōsang,
e leng lebone la ba khopo, ke sebe!
5Merero ea ea mafōlōfōlō
e mo tlisetsa nala,
lepōtla-pōtla lona le ikisa bofumeng.
6Tlotlo le fumanoang
ka ho bua leshano
ke mouoane o fetang,
le leraba la lefu.
7Likhōka tsa ba khopo
li tla ba timetsa,
hoba ba hana ho etsa ho lokileng.
8Tsela ea ba molato
e matsoelintsoeke,
boitšoaro ba ba hlokang koli
bo otlolohile.
9Ho molemo
ho iphelela sekhutloaneng,
kaholim'a marulelo a ntlo,
ho e-na le ho phela
le 'malikomang,
ho phela le eena
ka tlung e le 'ngoe.
10Motho ea khopo o labalabela bobe,
ha a qenehele ea ahisaneng le eena.
11Ha mosomi a otloa,
ea se nang tsebo oa hlalefa;
ha ea bohlale a rutoa
eena o fumana tsebo.
12Molimo ea lokileng
o hlahloba lapa la ea khopo,
o timetsa ea khopo
ka baka la bokhopo ba hae.
13Ea ithibang litsebe
ha mofutsana a lla,
le eena o tla lla,
empa a ke ke a mameloa.
14Mpho ea lekunutu
e thethefatsa bohale,
tjotjo e khoaetsoeng ka kobong,
e kokobetsa khalefo e tlōkōmang.
15Ha ho sebetsoa ka toka
ba lokileng baa thaba,
athe ba khopo
bona ba tlaloa ke tšabo.
16Ea khelohang tsela ea kutloisiso
pheletso ea hae
ke ho phomola har'a bafu.
17Ea hlanyetsang menyaka
o tla fumaneha,
ea ratang veine le limènyèmènyè
ha a ka ke a rua.
18Ea khopo o rekisoa
bakeng sa ea lokileng,
ea sa tšepahaleng
eena bakeng sa ea khabane.
19Ho molemo
ho iphelela har'a lehoatata,
ho e-na le ho phela
le nkoapō, 'malikomang.
20Lapeng la ea bohlale
ho tletse menono, le maruo,
athe sethoto sona
se hafaka se sa qenehele.
21Ea thahasellang ho loka le lerato
o tla fumana bophelo
le toka le tlōtla.
22Ea bohlale
o hlasela qhobosheane ea bahale,
a heletse marako ao ba a tšepileng.
23Ea koalang molomo,
a tšoara leme la hae,
o iphemisa
hore a se kene litsietsing.
24Moikhōhōmōsi ea mabefi
o bitsoa “mosomi”,
boikakaso ba hae ha bo na tekanyo.
25Takatso ea sekhōba ke lefu ho sona,
se leqe ho sebetsa,
ho sebetsa ka matsoho a sona;
26se qeta letsatsi se lakatsa,
se sa fumane,
empa ea lokileng
o fana a sa khanane.
27Sehlabelo sa ea khopo
sea nyonyeha,
haholo ha a se etsa
ka morero o mobe.
28Paki ea leshano e tla timela,
polelo tsa ea qalang ka ho mamela
lia amoheleha.
29Ea khopo
o sosobanya sefahleho,
ea lokileng
o hlokomela metsamao ea hae.
30Ha ho bohlale, kelello, kapa morero
o ka atlehang ha Morena a sa o rate.
31Pere e koetlisetsoa tsatsi la ntoa,
empa tlhōlo eona ke ea Morena.
