MAELE 20

₁Veine ke moikakasi,

joala bo baka lerata,

ea khelosoang ke tsona

o hloka bohlale.

₂Khalefo ea khosi

e joaloka tau ha e puruma,

ea halefisang khosi o ipea tsietsing.

₃Ke tlōtla ho khaohana le liqabang,

sethoto sona ke marata-helele!

₄Sekhōba ha se ke se lema

ka nako ea teng,

ha ho kotuloa sea kōpa,

ha se fumane letho.

₅Pelong ea motho

merero e ka metsi a boliba,

ea nang le kutloisiso

eena oa e fihlela.

₆Motho ka mong

o ithorisa ka molemo oa hae,

ea tšepahalang

eena a ka fumanoa ke mang?

₇Metsamao ea ea lokileng

ha e na koli,

bana ba hae ba tla hlohonolofala.

₈Khosi ha e lutse

tulong sa eona sa kahlōlo,

ka mahlo a eona

e tšeka bobe bohle.

₉Ke mang ea ka reng:

“Ke hloekisitse pelo ea ka,

'na ke hloekile ha ke na sebe?”

₁₀Tekanyo tse peli tse sa lekaneng,

esita le boima bo sa lekaneng,

bobeli ke manyala,

ke manyala mahlong a Morena.

₁₁Ngoana o tsejoa ka ketso tsa hae,

e ka ba tse ntle, e ka ba tse lokileng.

₁₂Tsebe e mamelang

le leihlo le bonang,

bobeli ba tsona

li entsoe ke Morena.

₁₃Se rate boroko, esere ua futsaneha;

se robale, u tl'u ateloe ke chai.

₁₄“Ha ea loka! Ha ea loka!”

ho rialo moreki.

Ha a furalla a tsamaee a ithorisa.

₁₅Khauta e teng

le mabenyane a bohlokoa a teng,

empa molomo o bolelang tsebo

ke lehakoe la bohlokoa.

₁₆Ea itlamang ka molato oa e mong,

u mo nkele kobo ea hae,

u e bee paneng ha a itlamme

ka molato oa motho eo.

₁₇Lijo tse fumanoeng ka bolotsana

li monate ho motho,

empa hamoraro molomo oa hae

o tlala lehlohlojane.

₁₈Rala merero ea hao

ka ho batla keletso,

ntoa u e loane

u se u fumane keletso.

₁₉Ea ratang litšebo

o hlahatsa makunutu,

motho oa lehèhlè

eka khona u mo koekoetle.

₂₀Haeba motho

a rohaka ntat'ae kapa 'm'ae,

bone la hae le tla tingoa

hoja ho le lefifi.

₂₁Leruo le bokelloang

ka potlako sethathong,

qetellong le ke ke

la hlohonolofatsoa.

₂₂Se ke ua re:

“Bobe ke tla bo phetetsa ka bobe!”

Lebella Morena, o tla u namolela.

₂₃Tekanyo tse peli tse sa lekaneng

ke manyala mahlong a Morena;

likala tsa bolotsana

le tsona ha li mo thabise.

₂₄Mehato ea motho

e laoloa ke Morena,

ebe joale motho

tsela a ka e tseba joang?

₂₅Ho abela Morena mpho ka potlako

ke leraba ho motho,

ebe hamorao o ipelaetsa

ka boitlamo ba hae.

₂₆Khosi e bohlale e hlōkōla ba khopo,

e ba ahlōle e se na kutloelo-bohloko.

₂₇Bone la Morena

ke oona moea oa motho,

le bonesa bokahare

ba pelo ea motho.

₂₈Khosi e sireletsoa

ke lerato le botšepehi,

terone ea eona e tsitsisoa ke lerato.

₂₉Tlōtla ea bacha ke matla a bona,

moriri o moputsoa

ke bokhabane ba maqheku.

₃₀Mehoabali

ke eona pheko ea bokhopo,

meupa e hloekisa bokahare ba pelo.