MAELE 1

₂a rutang motho

bohlale le khalemo,

le ho utloisisa

polelo tse tebileng;

₃a rutang bohlale, ho loka,

kutloisiso, le ho nepahetseng.

₄Ea se nang tsebo

o tla hlalefisoa ke 'ona,

mohlankana a rue tsebo le kelello.

₅Ea bohlale a a mamele,

a eketse tsebo le kutloisiso,

ea nang le kutloisiso

a fumane tataiso,

₆a utloisise maele le lipapiso,

polelo le lilōtho tsa ba bohlale.

₇Ho tšaba Molimo

ke qaleho ea tsebo,

empa lithoto li nyelisa bohlale,

li nyelisa le taeo.

₈Mor'a ka, mamela taeo ea ntat'ao,

u se furalle thuto ea 'm'ao.

₉Tsena ke moqhaka

oa bokhabane hloohong,

le lepetu le bohehang

molaleng oa hao.

₁₀Mora oa ka,

ha baetsalibe ba u hohela,

u se ke ua ineela ho bona.

₁₁Ha ba re: “Tloo le rōna,

re e'o lalla motho re 'molaee,

re tšolle mali

a ba se nang molato;

₁₂re ba metse ba phela

sa Qalo ea Bafu,

re ba metse bokoilitane

sa ba oelang ka mohohlong;

₁₃matlotlo a bohlokoa re tla a hapa,

matlo a rōna a tlale khapo ea rōna;

₁₄rōna le uena a re ikopanye,

mokotla o be mong, re arolelane.”

₁₅Mora oa ka,

se tsamaisane tsela le bona,

mohlaleng oa bona

u se ke be ua hata.

₁₆Maoto a bona a titimela bobeng,

a potlakela ho ea tšolla mali.

₁₇Ke bothoto ho cheha leraba

moo nonyana e ntseng e le bona.

₁₈Banna bana ba emetse lefu la bona,

ba ichehetse leraba ka bobona.

₁₉ba fella joalo

ba ithuisang ka bolotsana,

bophelo ba bona

bo felisoa ke matsoho a bona.

₂₀Tseleng tsohle bohlale boa meketsa,

mabaleng a motse boa tlerōla.

₂₁Har'a 'milimili bohlale boa hōoa,

bo phatlalatsa puo tsa bona

khorong tsa motse, bo re:

₂₂“Lōna ba se nang tsebo,

le tla rata ho se be le tsebo

ho fihlela neng?

Basomi ba thabele ho soma

ho fihlela neng?

Thoto li hloee tsebo

ho fihlela neng?

₂₃Hoja le ka mamela khalemo ea ka,

pelo ea ka nkabe ke le bulela eona,

mehopolo ea ka ke le tsebisa eona.

₂₄Kaha le hanne ha ke le bitsa,

ha ke otlolla tsoho la ka

la se ke la ela hloko;

₂₅kaha keletso ea ka

le sa ka la e natsa,

le khalemo ea ka

le sa e mamela;

₂₆koluoeng ea lōna

ke tla le ja tlepane,

ke le je litšeho

ha tlokotsi e le oela holimo.

₂₇Ha tlokotsi e le oela holimo,

e le oela holimo sa sefefo,

koluoa e le fefola,

e le fefola sa setsokotsane,

mahlomola le mapalesa-pelo

a le sithabelitse,

₂₈ba tla ipiletsa ho 'na

ke se ke ka ba araba,

ba mpatle ba se ke ba mphumana.

₂₉Kaha ba hloile tsebo,

ba ikhethetse ho se tsabe Molimo;

₃₀kaha keletso ea ka ba sa e amohela,

ba nyelisitse khalemo ea ka eohle,

₃₁kahoo ba tla kotula

seo ba se jetseng,

ba khore litholoana

tsa litakatso tsa bona.

₃₂Ba se nang tsebo

ba bolaoa ke ho kheloha ha bona,

lithoto tsona lia timela,

li timetsoe

ke ho se tsotelle ha tsona.

₃₃Ea 'mamelang

o tla phela a sireletsehile,

a phele ka boiketlo

a sa tšabe bobe.”